२८आश्विन,कजाकस्तान : रुसी राष्ट्रपति भ्लादिमिर पुटिनले युक्रेन विरुद्ध ‘तत्कालका लागि’ थप ‘ठूलो’ आक्रमणको योजना नरहेको र क्रेमलिनको उद्देश्य पश्चिमा समर्थित देशलाई ‘नष्ट’ गर्नु नभएको बताउनु भएको छ । कजाकिस्तानमा पूर्व सोभियत राष्ट्रहरूको शिखर सम्मेलनपछि पत्रकारहरूसँग उहाँले भन्नुभयो, “अहिले ठूलो आक्रमणको आवश्यकता छैन । अहिलेका लागि त्यहाँ अन्य कामहरू आवश्यक छन् ।”
रूसले युक्रेनको राजधानी कीभलगायत सम्पूर्ण क्षेत्रमा क्षेप्यास्त्र आक्रमण गरेको केही दिनपछि उहाँले सो कुरा बताउनुभएको हो । फेब्रुअरी २४ मा युक्रेनमा सेना पठाएका पुटिनले मित्र-राष्ट्रहरूबाट समेत अलगाव र आलोचनाको सामना गरिरहनु भएको छ । तर युक्रेनमा सरकार ढाल्ने असफल प्रयास र हप्तौं देखिको क्षेत्रीय क्षतिका बावजुद रूसले ‘सबै कुरा ठीक गरिरहेको’ उहाँले बताउनुभयो । उहाँले भन्नुभयो, “आज जे भइरहेको छ, त्यो सुखद छैन ।
यदि रूसले फेब्रुअरीमा आक्रमण नगरेको भए हामी पनि त्यस्तै अवस्थामा हुने थियौं । केवल हाम्रो लागि स्थिति खराब हुने थियो ।” रूसी नेता पुटिनले थप्नुभयो, “त्यसैले हामी सबै कुरा ठीक गरिरहेका छौं।” यद्यपि उहाँले मस्कोका पूर्व सोभियत सहयोगीहरू द्वन्द्वलाई लिएर ‘चिन्तित’ रहेको स्वीकार गर्नुभएको छ । पुटिनले भन्नुभयो, “पक्कै पनि हाम्रा साझेदारहरू रुसी–युक्रेनी सम्बन्धको भविष्य प्रति चासो राख्छन् र चिन्तित छन् तर यसले क्रेमलिनसँगको सम्बन्धमा कुनै असर नपार्ने उहाँको दाबी छ ।
उहाँले रूसमा परिचालन विस्तार गर्ने आफ्नो कुनै योजना नरहेको पनि बताउनुभएको छ । पुटिनले भन्नुभयो, “थप केही पनि योजना छैन । रक्षा मन्त्रालयबाट कुनै प्रस्ताव प्राप्त भएको छैन र म निकट भविष्यमा कुनै थप आक्रमणको आवश्यकता देख्दिनँ ।” उहाँले यस युद्धका लागि तीन लाख जनशक्ति परिचालन गर्ने लक्ष्य रहेकोमा दुई लाख २२ हजार जनशक्ति परिचालन गरिएको पनि बताउँदै करिब दुई हप्ताभित्र सबै परिचालनका काम सम्पन्न हुने उल्लेख गर्नुभयो ।(रासस/एएफपी)
आफ्नो प्रतिकृया दिनुहोस्