६ चैत्र,(एजेन्सी): चीनले देशकै अहिले सम्मकै ठूलो कार्गो ड्रोनको पहिलो उडान सफलतापूर्वक सम्पन्न गरेको छ।शनिबार बिहान, पूर्वी चीनको शानडोङ प्रान्तको छिङदाओ शहरबाट एक टनसम्मको पेलोड बोक्न सक्ने “TP-1000” ड्रोनले सफल परीक्षण उडान पूरा गरेको हो।
समाचार एजेन्सीहरूका अनुसार, यो नवीन ड्रोन एयरड्रप क्षमता सहित सुसज्जित चीनको पहिलो ठूलो मानवरहित यातायात विमान हो। चीनको नागरिक उड्डयन मापदण्ड अनुरूप पूर्ण रूपमा विकसित गरिएको यस ड्रोनको अधिकतम टेकअफ तौल ३.३ टन र पेलोड क्षमता १,००० किलोग्राम रहेको छ।
कम उचाइमा कार्गो ढुवानीको बढ्दो माग पूरा गर्न TP-1000 भरपर्दो समाधान हुने बताइएको छ। परीक्षण उडानका क्रममा यो ड्रोन २६ मिनेट सम्म आकाशमा रह्यो, जसले उत्कृष्ट स्थिरता, गतिशीलता र पावर प्रणाली प्रदर्शन गरेको अनुसन्धान तथा विकास टोलीका नेता जिन गेले बताए।
यो ड्रोन २०२६ सम्म व्यावसायिक सञ्चालनमा आउने अपेक्षा गरिएको छ, जसले चीनको मानवरहित हवाई वाहन प्रविधिलाई नयाँ उचाइमा पुर्याउने तथा आपतकालीन अवस्थामा समेत उपयोगी हुने बताइएको छ।(‘सिसि टीभी प्लस’)
आफ्नो प्रतिकृया दिनुहोस्