२० चैत्र,जनकपुरधाम: जनकपुर स्थित शिवचोक नजिक बिना नक्सा पास गरिएको अवैध संरचना भत्काउने प्रक्रिया अन्तिम चरणमा पुगेको छ। तर, कानुन मिच्दै संरचना बनाउने घरधनी उत्साहित देखिएका छन्, जसले नागरिकहरू लाई झनै आक्रोशित बनाएको छ।
जनकपुरधाम उपमहानगरपालिकाका प्रमुख मनोज साहको कडा निर्देशन अनुसार उपमहानगरपालिकाले अवैध संरचना हटाउने अभियान लाई तीव्रता दिएको छ। यही क्रममा शिवचोक क्षेत्रमा बनेका बिना नक्सा पास गरिएका घर तथा संरचनाहरू तोडफोड गर्नु पर्ने प्रशासनको धारणा रहेको छ।
नगर प्रहरी यस कार्यको गम्भीर निगरानी गरिरहेको छ भने इन्चार्जले अन्तिम आदेशको प्रतीक्षा गरिरहेको छ। स्थानीय बासिन्दाहरूले भने नगरपालिकाको यो कदम कानुनी रूपमा उचित भए पनि निष्पक्ष रूपमा कार्यान्वयन हुनु पर्ने माग राखेका छन्।
नागरिकको आक्रोश, प्रशासनको कडा निगरानी
यस घटनाले नगरमा तनावको वातावरण सिर्जना गरेको छ। कतिपय नागरिकहरूले उपमहानगरपालिकाले पहुँचवाला एवं नाता-गोताको घर जोगाएर अरूको मात्र भत्काउने पक्षपाती नीति लिएको आरोप लगाएका छन्। उता, केही स्थानीय भने शहरको सौन्दर्य र कानुनी व्यवस्थापनका लागि अवैध संरचना हटाउनै पर्ने पक्षमा छन्।
अब, उपमहानगरपालिकाले सबैलाई समान रूपमा कारबाही गर्ने कि कुनै सम्झौताका आधारमा निर्णय लिने भन्ने प्रश्न उठिरहेको छ। यस घटनाले जनकपुरको शहरी विकास र कानुनी व्यवस्थापनमा प्रशासनको क्षमता माथि गम्भीर प्रश्न चिन्ह खडा गरेको छ।
आफ्नो प्रतिकृया दिनुहोस्