२४ वैशाख,नयाँ दिल्ली : भारतले पाकिस्तान र पाकिस्तान-अधीनस्थ काश्मीरका ९ स्थानमा हवाई आक्रमण गरेको दाबी गरेको छ। भारतीय रक्षा मन्त्रालयका अनुसार आक्रमण पाकिस्तानको बहावलपुर, मुरीदके, गुलपुर, सवाई, बिलाल, कोटली, बरनाला, सरजाल र महमूनामा गरिएको हो।
पाकिस्तानी सेनाका अनुसार, आक्रमणमा परी ८ जनाको मृत्यु भएको छ भने ३५ जना घाइते भएका छन्। रोयटर्स र एएफपीलाई दिएको जानकारी अनुसार, मृतक मध्ये दुई बालबालिका समेत छन्। सेनाले दुई जना अझै हराइरहेको बताएको छ।
पाकिस्तानी सैन्य प्रवक्ताले ६ स्थानमा २४ वटा मिसाइल प्रहार गरिएको जानकारी दिएका छन्। पाकिस्तानले तीन बालबालिका सहित सात जनाको मृत्यु भएको बताएको छ।
भारत–पाकिस्तान तनावको असर अन्तर्राष्ट्रिय हवाई सेवामा पनि परेको छ। भारतले भारत-अधीनस्थ काश्मीरमा हुने अधिकांश उडानहरू रद्द गरेको छ। साथै, धेरै अन्तर्राष्ट्रिय एयरलाइन्सहरूले पाकिस्तानको आकाशमार्ग प्रयोग नगर्ने निर्णय गरेका छन्।
पाकिस्तानले दिएको प्रतिक्रिया
पाकिस्तानी सूचना मन्त्री अतुल्लाह तरारले भारतले सिमा नाघेको भन्दै त्यसको कडा जवाफ दिने चेतावनी दिएका छन्। पाकिस्तानले कम्तीमा दुई भारतीय जेट र एक ड्रोन खसालेको दाबी समेत गरेको छ।
अन्तर्राष्ट्रिय हवाई उडान प्रभावित
पाकिस्तानको हवाई क्षेत्र बन्द भएपछि कतार एयरवेजले पाकिस्तानका लागि सबै उडानहरू अस्थायी रूपमा स्थगित गरेको जनाएको छ। एयरलाइन्सले यात्रु र चालक दलको सुरक्षालाई ध्यानमा राख्दै यस्तो निर्णय गरिएको बताएको छ।
कतार एयरवेजले यात्रुहरूलाई पछिल्लो जानकारीका लागि आफ्नो आधिकारिक वेबसाइट हेर्न सल्लाह दिएको छ।यसैबीच, एयर फ्रान्स र जर्मन एयरलाइन्स लुफ्थान्साले पनि अर्को सूचना नआए सम्मका लागि पाकिस्तानको हवाई क्षेत्र प्रयोग नगर्ने निर्णय गरेका छन्।
आफ्नो प्रतिकृया दिनुहोस्