२२ माघ ,सिराहा । उज्यालो नेपाल पार्टीका अध्यक्ष एवं पूर्वमन्त्री कुलमान घिसिङले बिहीबार सिराहा र धनुषाको सीमानामा पर्ने चर्चित कमला नदी पार गर्दै आफ्नो चुनावी अभियानको औपचारिक सुरुवात गरेका छन्। तराई–मधेशको लाइफलाइन मानिने हुलाकी राजमार्ग अन्तर्गतको यस क्षेत्रमा वर्षौँ देखि अलपत्र पुलको विकल्पमा निर्माण गरिएको अस्थायी डाइभर्सन प्रयोग गर्दै उनी सिराहा तर्फ प्रवेश गरेका हुन्।
ऊर्जा, भौतिक पूर्वाधार तथा शहरी विकास जस्ता महत्वपूर्ण मन्त्रालयको जिम्मेवारी सम्हालिसकेका घिसिङलाई स्वागत गर्न कमला पुल परिसरमा पार्टीका नेता, कार्यकर्ता र स्थानीयवासीको ठूलो उपस्थिति रहेको थियो, जसले यस क्षेत्रको राजनीतिक माहोललाई निकै तताएको छ।
विगत १४ वर्ष देखि पुल निर्माण कार्य पूरा नहुँदा स्थानीयले भोग्नु परेको सास्ती र जोखिमपूर्ण यात्राको अन्त्यका लागि घिसिङले भौतिक पूर्वाधार मन्त्री रहँदा विशेष चासो देखाएका थिए। गत मंसिर ५ गते पुलको स्थलगत निरीक्षणका क्रममा देखिएको जनगुनासो र जोखिमलाई मध्यनजर गर्दै उनले दिएको कडा निर्देशन पछि मात्र नदी क्षेत्रमा ह्युम पाइप राखेर यो अस्थायी आवत–जावतको व्यवस्था मिलाइएको हो।
वर्षौँदेखि लामो वैकल्पिक मार्ग प्रयोग गर्न बाध्य सवारीसाधन र सर्वसाधारणले अहिले अस्थायी रूपमै भए पनि नदी पार गर्न पाएपछि ठूलो राहत महसुस गरेका छन्। घिसिङले आफैँले सुरु गराएको डाइभर्सनबाट यात्रा गर्न पाउँदा खुसी व्यक्त गर्दै अलपत्र रहेको ४६९ मिटर लामो स्थायी पुलको बाँकी कामको पनि सुक्ष्म अवलोकन गरेका छन्।
यो चुनावी भ्रमण केवल सांकेतिक मात्र नभई तराईका जिल्लाहरूमा पार्टीको उपस्थिति मजबुत बनाउने रणनीतिक योजनाका रूपमा हेरिएको छ। आफ्नो अभियानका क्रममा घिसिङले धनुषा, सिराहा र सप्तरीका विभिन्न निर्वाचन क्षेत्रमा पुगेर पार्टीका उम्मेदवार, स्थानीय कार्यकर्ता र मतदाताहरूसँग प्रत्यक्ष संवाद गर्ने कार्यक्रम तय भएको छ।
विकास र समृद्धिको एजेन्डा बोकेर चुनावी मैदानमा उत्रिएका घिसिङले अधुरा पूर्वाधारलाई पूर्णता दिने र जनताका आधारभूत समस्या समाधान गर्ने प्रतिबद्धतालाई नै यस पटकको मुख्य चुनावी एजेन्डा बनाएका छन्।
आफ्नो प्रतिकृया दिनुहोस्