२३ माघ ,सप्तरी । जनता समाजवादी पार्टी (जसपा) नेपालका अध्यक्ष उपेन्द्र यादवले आसन्न प्रतिनिधिसभा निर्वाचनमा जनताको मत र जीतको असली हकदार आफ्नो पार्टी मात्र रहेको दाबी गर्नु भएको छ। सप्तरीको विष्णुपुर गाउँपालिका–७, इटहरीमा शुक्रबार आयोजित चुनावी छलफल तथा भेटघाट कार्यक्रमलाई सम्बोधन गर्दै अध्यक्ष यादवले मधेश जनविद्रोहको ऐतिहासिक स्वामित्व, निरन्तरको सङ्घर्ष र सीमान्तकृत समुदायका एजेन्डाका कारण जसपा नेपाल नै जनताको पहिलो रोजाइ हुनु पर्ने तर्क गर्नु भयो।
उहाँले कठोर सङ्घर्षबाट प्राप्त अधिकार र अवसरहरूको जगमा टेकेर बाँकी अधिकार प्राप्तिका लागि पनि आफ्नो पार्टी लाई जिताउनुको विकल्प नरहेको जिकिर गर्नु भयो।मधेश विद्रोहकै कारण आज सरकारी सेवा, सेना र प्रहरी लगायतका सुरक्षा अङ्गहरूमा मधेशी, महिला, दलित, आदिवासी जनजाति, थारु र मुस्लिम समुदायको प्रतिनिधित्व र आरक्षण सुनिश्चित भएको स्मरण गराउँदै उहाँले यसलाई आन्दोलनको ठूलो उपलब्धिका रूपमा चित्रण गर्नु भयो।
सप्तरी क्षेत्र नम्बर ३ बाट प्रतिनिधिसभा सदस्यका उम्मेदवार समेत रहनु भएका यादवले विगतमा सरकारी कार्यालयहरूमा मधेशी अनुहार देख्न मुस्किल हुने अवस्था रहे पनि अहिले समावेशिताको बाटो खुलेको बताउनु भयो। यद्यपि, मधेशमा अझै पनि अशिक्षा र गरिबी व्याप्त रहेको औंल्याउँदै उहाँले अबको लडाइँ पूर्ण अधिकार र विकासका लागि केन्द्रित हुने स्पष्ट पार्नु भयो।
सङ्घीय संरचनामा प्रदेशहरू स्थापना भए पनि ती अझै अधिकारविहीन रहेको गुनासो गर्दै अध्यक्ष यादवले अब प्रदेशहरूलाई वास्तविक रूपमा अधिकारसम्पन्न बनाउने जिम्मेवारी आफ्नो पार्टीले पुरा गर्ने प्रतिबद्धता व्यक्त गर्नु भयो। उहाँले जनसङ्ख्याको आधारमा निर्वाचन क्षेत्र निर्धारण र विकासीय बजेट विनियोजन हुनुपर्ने माग गर्दै शोषित र उत्पीडित जनताको अधिकार प्राप्तिका लागि आन्दोलनलाई थप सशक्त बनाउनुपर्नेमा जोड दिनु भयो।
मधेशको स्वाभिमान उच्च राख्दै प्रदेशलाई आर्थिक रूपमा समृद्ध र सामाजिक रूपमा समावेशी बनाउन सम्पूर्ण प्रदेशवासी एक जुट हुनु पर्ने उहाँको भनाइ रहेको थियो।
आफ्नो प्रतिकृया दिनुहोस्