७ चैत,एजेन्सी : इरान र इजरायल बीच बढ्दो सैन्य टकरावका कारण विश्वभरको सुरक्षा व्यवस्थामा नयाँ चुनौती थपिएको छ। हालै इरानी सेनाका मुख्य प्रवक्ता जनरल अबोलफजल शेकार्चीले आफ्ना शत्रुहरूलाई लक्षित गर्दै विश्वभरका पर्यटकीय क्षेत्र, पार्क र मनोरञ्जन स्थलहरू अब सुरक्षित नरहने चेतावनी दिएका छन्। अल जजीराका अनुसार इरानले मध्यपूर्व भन्दा बाहिर पनि ‘छापामार’ शैलीका आक्रमणहरू विस्तार गर्न सक्ने धम्की दिए पछि विश्वव्यापी रूपमा चिन्ता बढेको हो।
यो तनावको शृङ्खला तब सुरु भयो जब इजरायलले इरानको विशाल ‘साउथ पार्स’ प्राकृतिक ग्यास क्षेत्रमा बमबारी गर्यो। यसको प्रतिशोध स्वरूप इरानले खाडी मुलुकका ऊर्जा केन्द्रहरूमा आक्रमण तीव्र पारेको छ। शुक्रबार बिहान मात्र इरानले कुवेतको महत्वपूर्ण मिना अल–अहमदी तेल प्रशोधन केन्द्रमा दुई चरणमा ड्रोन आक्रमण गरेको छ, जसका कारण त्यहाँ भीषण आगलागी भएको बताइएको छ। दैनिक ७ लाख ३० हजार ब्यारेल तेल प्रशोधन गर्ने क्षमता भएको यो केन्द्रमा भएको क्षतिले अन्तर्राष्ट्रिय ऊर्जा बजारमा समेत हलचल ल्याएको छ।
यसैबीच, अमेरिकी अर्थमन्त्री स्कट बेसेन्टले इरानी तेलमाथिको प्रतिबन्ध खुकुलो पार्न सक्ने संकेत गरे पनि इरानले त्यसलाई अर्थहीन भनेको छ। इरानी तेल मन्त्रालयका प्रवक्ता सामन घोड्दुसीले हाल इरानसँग अन्तर्राष्ट्रिय बजारका लागि कुनै अतिरिक्त कच्चा तेल बाँकी नरहेको स्पष्ट पार्दै अमेरिकी भनाइ केवल खरिदकर्तालाई सान्त्वना दिने खेल मात्र भएको टिप्पणी गरेका छन्।
अर्को तर्फ, इरानले संयुक्त अरब इमिरेट्स (युएई) लाई पनि कडा चेतावनी दिएको छ। यदि युएईको भूमि प्रयोग गरेर रणनीतिक रूपमा महत्त्वपूर्ण हर्मुज जलमार्ग नजिकका इरानी टापुहरूमा पुन: आक्रमण भएमा युएईको ‘रास अल–खैमाह’ शहरमा ध्वंसात्मक प्रहार गर्ने इरानको धम्की छ। विश्वको झन्डै २० प्रतिशत तेल र ग्यास ढुवानी हुने यस क्षेत्रमा बढ्दो तनावले गर्दा अहिले सम्पूर्ण खाडी क्षेत्र युद्धको सँघारमा पुगेको देखिन्छ।
आफ्नो प्रतिकृया दिनुहोस्