१४ फागुन,मोरङ । आसन्न निर्वाचनको मिति नजिकिँदै जाँदा मोरङ निर्वाचन क्षेत्र नम्बर–१ को चुनावी माहोल निकै तातेको छ। विगत एक दशक देखि दुई पुराना दल र सीमित अनुहारको वरिपरि घुमेको यहाँको राजनीति यस पटक भने एउटा रोचक र नयाँ मोडमा पुगेको छ।
यस पटकको प्रतिस्पर्धा केवल प्रतिनिधि चयनमा मात्र सीमित छैन, बरु यो पुराना राजनीतिक शक्ति र परिवर्तनको खोजीमा रहेका मतदाता बीचको मनोविज्ञानको परीक्षणसमेत बनेको छ।
विगतका तीन निर्वाचनमा मोरङ–१ मा नेपाली कांग्रेसका डिग बहादुर लिम्बू र नेकपा एमालेका घनश्याम खतिवडा बीच मुख्य प्रतिस्पर्धा हुँदै आएको थियो। तर यस पटक समीकरण बदलिएको छ। कांग्रेसले अनुभवी नेता लिम्बूको स्थानमा उर्लाबारीका पूर्व नगर प्रमुख खड्ग फागोलाई चुनावी मैदानमा उतारेको छ।
नगरप्रमुख हुँदाको सक्रियता र स्थानीय विकासमा देखाएको तत्परतालाई कांग्रेसले आफ्नो मुख्य चुनावी पुँजी बनाएको छ। फागोले युवा मतदाता र विकास प्रेमी तप्कालाई आकर्षित गर्दै नयाँ राजनीतिक अध्याय सुरु गर्ने रणनीति लिएका छन्।
अर्को तर्फ, एमालेका उम्मेदवार घनश्याम खतिवडाका लागि यो निर्वाचन आफ्नो विरासत जोगाउने ठूलो चुनौती बनेको छ। एमालेको कोशी प्रदेश अध्यक्षसमेत रहेका खतिवडासँग बलियो सङ्गठनात्मक संरचना र कार्यकर्ताको ठूलो सञ्जाल छ।
यद्यपि, अधुरा योजना र मतदाताको बढ्दो अपेक्षाका बीच उनीमाथि विगतको भन्दा बढी दबाब देखिन्छ। विश्लेषकहरूका अनुसार खतिवडाले यस पटक प्रतिस्पर्धी दलसँग मात्र होइन, मतदातामा व्याप्त असन्तुष्टिसँग पनि लड्नु पर्ने अवस्था छ।
यस पटकको निर्वाचनलाई अझ बढी बहुपक्षीय र रोचक बनाएको पक्ष भनेको नयाँ र वैकल्पिक शक्तिहरूको उदय हो। राष्ट्रिय स्वतन्त्र पार्टीबाट अधिवक्ता यज्ञमणि न्यौपाने र हर्क साम्पाङको श्रम संस्कृति पार्टीबाट शान्ति पाख्रिन लामाको उम्मेदवारीले पुराना दलको मत काट्ने निश्चित देखिन्छ।
त्यस्तै, पूर्वसांसद कुलप्रसाद साम्बा ‘कुशल’ को उपस्थितिले वामपन्थी मत विभाजन हुन सक्ने सम्भावना बढेको छ। १ लाख २८ हजार भन्दा बढी मतदाता रहेको यस क्षेत्रमा विगतमा पनि हार-जितको अन्तर निकै झिनो हुने गरेको थियो।
समग्रमा, मोरङ–१ मा यस पटक मतदाताको मनोविज्ञान निर्णायक हुने देखिएको छ। पुराना दलको सङ्गठनात्मक शक्ति र नयाँ शक्तिहरूको परिवर्तनको नारा बीचको यो भिडन्तले मोरङको मात्र नभई बदलिँदो नेपाली राजनीतिको दिशा समेत सङ्केत गर्नेछ। परिणाम जसको पक्षमा आए पनि, यस क्षेत्रले राजनीतिक विरासत र नयाँ विकल्पबीचको एउटा ऐतिहासिक लडाइँको प्रत्यक्ष अनुभव गरिरहेको छ।
आफ्नो प्रतिकृया दिनुहोस्