२१ चैत,वीरगन्ज । वीरगन्ज महानगरपालिका वडा नम्बर १ मा ११ वर्षीया बालिका माथि यौनजन्य हिंसाको प्रयास गर्ने एक अधबैँसे पुरुषलाई प्रहरीले नियन्त्रणमा लिएको छ। वीरगन्ज–८ दुर्गा रोडमा किराना र मासु पसल सञ्चालन गर्दै आएका छपकैया निवासी ५० वर्षीय इस्माइल मियालाई पक्राउ गरिएको जिल्ला प्रहरी कार्यालय पर्साले जनाएको छ।
घटना विवरण अनुसार शनिबार बिहान ११ बजेको समयमा पीडित बालिका पसलको पुरानो बाँकी रकम तिर्न गएकी थिइन्। सोही मौकाको फाइदा उठाउँदै मियाले बालिकालाई पसलभित्र लगी मोबाइलमा अश्लील भिडियो देखाएर अनैतिक कार्यको प्रयास गरेका थिए।
आफूमाथि हिंसा हुन खोजे पछि बालिकाले अदम्य साहस प्रदर्शन गर्दै अभियुक्तको हातमा जोडले दाँतले टोकेर उम्कन सफल भएकी थिइन्। अपराधीको पन्जाबाट फुत्किएर घर पुगेकी बालिकाले रुँदै परिवारलाई घटनाबारे जानकारी गराएपछि यो विषय बाहिर आएको हो।
घटना पछि आक्रोशित आफन्त र स्थानीय बासिन्दा पसलमा पुग्दा मिया पसल बन्द गरी फरार भइसकेका थिए। पीडित परिवारले तत्कालै वडा प्रहरी कार्यालय बिर्तामा लिखित निवेदन दिएपछि प्रहरीले सक्रियता बढाएको थियो। लुकिछिपी बसेको अवस्थामा मियालाई छपकैयाबाट पक्राउ गरिएको हो।
नातिनी उमेरकी बालिकामाथि भएको यस जघन्य हर्कतले वीरगन्जवासीलाई स्तब्ध बनाएको छ भने स्थानीयले दोषीमाथि कडाभन्दा कडा कानुनी कारबाहीको माग गरेका छन्। पक्राउ परेका मियामाथि प्रहरीले थप अनुसन्धान प्रक्रिया अगाडि बढाएको छ।
आफ्नो प्रतिकृया दिनुहोस्