१८ चैत,जनकपुर । धनुषा प्रहरीले ठूलो परिमाणमा लागूऔषध सहित एक फार्मेसी सञ्चालकलाई पक्राउ गरेको छ। जिल्लाको ढल्केबर स्थित एक औषधि पसलबाट लागू औषध बरामद गर्दै सञ्चालकलाई नियन्त्रणमा लिइएको हो।
पक्राउ पर्नेमा मिथिला नगरपालिका–७, ढल्केबर निवासी ५० वर्षीय राम कुमार महतो रहेका छन्। उनी निको फार्मेसीका सञ्चालक भएको इलाका प्रहरी कार्यालय ढल्केबरले जनाएको छ। महतोको फार्मेसीबाट टापेन्टा ट्याब्लेट ४६० पत्ता, स्पासरेस्ट ९५ पत्ता, डोवेल ६० पत्ता तथा नगद १ लाख ३५ हजार रुपैयाँ बरामद गरिएको प्रहरीले जनाएको छ।
यस अघि मिथिला नगरपालिका–१०, रातोपुल स्थित लालगढबाट बर्दिवास तर्फ पैदल जाँदै गरेका तीन जना शंकास्पद युवालाई चेकजाँच गर्दा उनीहरूको साथबाट टापेन्टा लागू औषध फेला परेको थियो। पक्राउ पर्नेमा सिन्धुली दुधौली नगरपालिका–५ का २० वर्षीय साजन परियार, २१ वर्षीय दोर्जे लामा र २० वर्षीय दीपेश साह रहेका छन्।
ती युवा माथि अनुसन्धान गर्दै जाँदा लागूऔषध कारोबारमा निको फार्मेसीको संलग्नता खुले पछि प्रहरीले छापा मारेर सञ्चालक महतोलाई पक्राउ गरेको हो। घटनाबारे थप अनुसन्धान भइरहेको प्रहरीले जनाएको छ।
आफ्नो प्रतिकृया दिनुहोस्