(आशिष कुमार मण्डल) : नेपालमा निर्वाचन नजिकिँदैछ, तर राजनीतिक वातावरण अझै पनि चुनाव केन्द्रित बनेको छैन। नेताहरू सत्ताको गणितमा व्यस्त छन्, जबकि मतदाताहरू विशेषगरी युवापुस्ता उदासीन र निराश देखिन्छन्। विडम्बना के छ भने, देशको सबैभन्दा ठूलो जनसंख्या समूह नै युवाहरू हुन्, तर उनीहरू नीति निर्माण र निर्णय प्रक्रियाको केन्द्रमा अझै पनि सन्निहित छैनन्। यही कारणले देशको राजनीति पुरानै ढर्रामा अड्किएको छ, जहाँ नयाँ सोच, दृष्टि र नवप्रवर्तनका लागि ठाउँ न्यून छ।
आजका युवाहरू शिक्षित छन्, सीपयुक्त छन्, र विश्व परिवेश बुझ्नसक्ने क्षमतायुक्त छन्। उनीहरू पारदर्शी शासन, सुशासन र आर्थिक प्रगतिका सपना बोकेर हिँडिरहेका छन्। तर राजनीतिक दलहरूले उनीहरूको सपना साकार पार्ने अवसर कमै दिएका छन्। दलका नेताहरूले युवालाई केवल मतदाताको रूपमा हेर्छन्, नेतृत्वको रूपमा होइन। परिणामत: राजनीतिक प्रणाली प्रति जनविश्वास क्रमश: घट्दै गएको छ।
परिवर्तनका लागि युवाहरूले बुझ्नुपर्ने कुरा स्पष्ट छ, केवल सामाजिक मिडियामा आवाज उठाएर वा सडकमा नाराबाजी गरेर पर्याप्त हुँदैन। वास्तविक परिवर्तन राजनीतिभित्र प्रवेश गरेर मात्र सम्भव हुन्छ। राजनीति सत्ता प्राप्तिको साधन मात्र होइन, जिम्मेवारी र रूपान्तरणको माध्यम हो। यदि हरेक गाउँ, वडा, नगरपालिका र जिल्लामा युवाहरू अग्रसर भए, देशको राजनीतिक संस्कृतिमा नयाँ अध्याय खुल्ने छ।
युवाको राजनीतिक सहभागिताले सुशासन, प्रविधिमुखी नीति र पारदर्शिता ल्याउन सक्छ। उनीहरूले भ्रष्टाचार घटाउने, उत्तरदायित्व बढाउने र दक्ष प्रशासनिक प्रणाली निर्माण गर्ने क्षमता राख्छन्। नयाँ पुस्ताको सोच र ऊर्जाले देशलाई स्थायित्व, प्रगति र विश्वसनीयताको बाटोमा अघि बढाउँछ।
तर मार्ग सजिलो छैन। पुरानो राजनीतिक सोच, गुटबन्दी, जातीय र क्षेत्रीय पूर्वाग्रहहरूले युवालाई अघि बढ्न कठिन बनाएका छन्। तर यिनै चुनौती भित्र अवसर पनि लुकेका छन्। आत्मविश्वास, इमानदारी र दृढ दृष्टिकोणले युवाहरूले आफ्नो पहिचान र स्थान बनाउन सक्छन्।
विदेशमा रहेका नेपाली युवाहरूले पनि देशप्रतिको जिम्मेवारी बिर्सनु हुँदैन। विदेशमा सिकेका सीप, अनुभव र दृष्टिकोण स्वदेश फर्काएर उपयोग गर्न सकिन्छ। उनीहरूको योगदान नीति निर्माण, प्रशासनिक सुधार र आर्थिक रुपान्तरणमा महत्त्वपूर्ण हुन सक्छ।
मतदाताहरूले पनि अब सोच बदल्नु पर्छ ,उमेर होइन, सोच र कार्यको मुल्याँकन गर्नु पर्छ। पुरानै अनुहार प्रति अन्धविश्वास गर्ने समय बितिसक्यो। अब नीति, दृष्टि र परिणामका आधारमा नेता रोज्ने समय आएको छ।
यदि युवाहरूले निर्वाचनमा सक्रिय भूमिका नखेले भने, पुरानो राजनीतिक ढर्रा दोहोरिन्छ, जसले देशलाई अघि बढ्न दिँदैन। त्यसैले, युवाहरूले केवल मतदाता भएर होइन, उम्मेदवार भएर पनि चुनावी मैदानमा उत्रिनु पर्छ। दलभित्र सुधार ल्याएर, जनताको बीच नयाँ विकल्पको रूपमा प्रस्तुत हुनुपर्छ।
अन्तत: राजनीतिमा प्रवेश गर्नु कुनै पार्टी वा पदको लागि मात्र होइन, देश र समाजप्रतिको उत्तरदायित्व हो।यदि हरेक युवा आफ्नो क्षेत्रमा एउटा सानो परिवर्तन ल्याउने प्रण गर्छ भने, त्यो नै नयाँ नेपालको राजनीतिक पुनर्जागरण हुनेछ।
आफ्नो प्रतिकृया दिनुहोस्