१ फागुन,काठमाडौं । राष्ट्रपति रामचन्द्र पौडेलले राष्ट्रिय क्याडेट कोर (एनसीसी) ले युवाहरूमा राष्ट्रियता, देशभक्ति र नेतृत्व विकास गर्न खेलिरहेको भूमिकाको उच्च प्रशंसा गर्नु भएको छ। शुक्रबार शीतल निवासमा आयोजित ‘एनसीसी युथ एक्सचेन्ज प्रोग्राम’ का सहभागीहरूलाई सम्बोधन गर्दै उहाँले विश्वव्यापी अवधारणाका रूपमा स्थापित एनसीसीले नेपाली युवाहरूलाई आत्मविश्वास र राष्ट्रसेवाको भावनाले ओतप्रोत बनाउनु अत्यन्तै सकारात्मक पक्ष रहेको बताउनुभयो।
राष्ट्रपति पौडेलले यस कार्यक्रमले विभिन्न देशका युवाहरूलाई एउटै मञ्चमा एकत्रित गरी उनीहरूलाई वफादार, अनुशासित र जिम्मेवार नागरिकका रूपमा रूपान्तरण गर्दै भविष्यको सफल नेतृत्वकर्ता तयार पारिरहेको धारणा व्यक्त गर्नु भयो। उहाँका अनुसार युवाहरूमा यस्ता गुणहरूको विकास हुनु खुसीको विषय मात्र नभई राष्ट्र निर्माणका लागि एक बलियो आधार पनि हो।
सम्बोधनका क्रममा उहाँले युवा आदान–प्रदान कार्यक्रमको कूटनीतिक र सांस्कृतिक महत्त्वमाथि पनि प्रकाश पार्नु भयो। नेपाली सेनाले मित्र राष्ट्रका सेनाहरूसँगको आपसी सम्बन्धलाई थप प्रगाढ बनाउन यस्ता कार्यक्रमले सेतुको काम गरेको उहाँको भनाइ थियो।
हालै भारत, भुटान, पाकिस्तान र माल्दिभ्समा आयोजित कार्यक्रमहरूमा सहभागी भएका नेपाली क्याडेटहरूले आफ्नो सीप, संस्कृति र परम्परालाई अन्तर्राष्ट्रिय स्तरमा साटासाट गर्ने सुनौलो अवसर पाएको राष्ट्रपतिले उल्लेख गर्नुभयो।
अन्त्यमा, राष्ट्रपति पौडेलले यस्ता अन्तर्राष्ट्रिय अनुभवले युवाहरूलाई विभिन्न देशको सामाजिक, आर्थिक र सांस्कृतिक यथार्थ बुझ्न मद्दत गर्ने विश्वास दिलाउनुभयो। ‘विश्व नै एक समुदाय हो’ भन्ने भावनालाई बलियो बनाउँदै मित्र राष्ट्रहरूसँगको सम्बन्धलाई थप सुमधुर बनाउन यस्ता कार्यक्रमले कोशेढुङ्गा सावित हुने विश्वासका साथ उहाँले आफ्नो सम्बोधन टुङ्ग्याउनु भयो।
आफ्नो प्रतिकृया दिनुहोस्