८ फागुन,काठमाडौं । आसन्न निर्वाचनलाई निष्पक्ष र सुरक्षित तवरले सम्पन्न गर्ने उद्देश्यका साथ प्रधानमन्त्री सुशीला कार्कीले आज गण्डकी प्रदेशका विभिन्न जिल्लाहरूको स्थलगत भ्रमण गरी तयारीको विस्तृत अनुगमन तथा समीक्षा गर्नुभएको छ। भ्रमणका क्रममा हिमाली जिल्ला मुस्ताङ पुग्नुभएकी प्रधानमन्त्रीले प्रसिद्ध मुक्तिनाथ मन्दिर र जोमसोम लगायतका क्षेत्रको अवलोकन गर्दै स्थानीय बासिन्दा र निर्वाचनमा खटिएका कर्मचारीहरूसँग प्रत्यक्ष संवाद गर्नु भयो।
जोमसोममा आयोजित उच्चस्तरीय बैठकमा प्रमुख जिल्ला अधिकारी र मुख्य निर्वाचन अधिकृतसहित सुरक्षा निकायका प्रमुखहरूसँग निर्वाचनका सम्भावित चुनौती र विशेष गरी हिमाली क्षेत्रमा हुन सक्ने मौसमी प्रतिकूलताका विषयमा गम्भीर छलफल भएको थियो।
बैठकमा माथिल्लो भेगमा हिमपात वा वर्षा भएमा मतदान प्रक्रिया प्रभावित हुन सक्ने सम्भावना औँल्याइएपछि प्रधानमन्त्री कार्कीले विकट क्षेत्रमा खटिने कर्मचारी र सुरक्षाकर्मीका लागि आवश्यक औषधी, प्राथमिक उपचार सामग्री र अन्य उपकरणको पर्याप्त व्यवस्था गर्न कडा निर्देशन दिनुभयो।
मुस्ताङका विभिन्न हिमाली बस्तीहरूको हवाई निरीक्षण समेत गर्नु भएकी प्रधानमन्त्रीले राज्यका तर्फबाट कुनै पनि प्राविधिक वा व्यवस्थापकीय कमी हुन नदिने प्रतिबद्धता जनाउनु भयो।मुस्ताङको भ्रमण सकेर पोखरा आइपुग्नु भएकी प्रधानमन्त्रीले विजयपुरस्थित नेपाली सेनाको पश्चिम पृतना मुख्यालयमा गण्डकी प्रदेश कमान्ड पोस्ट तथा निर्वाचन सेलको विशेष बैठकमा सहभागिता जनाउनु भयो।
उक्त बैठकमा प्रदेशका मुख्य सचिव डण्डुराज घिमिरे र पृतनापति उपरथी भोला थापाले निर्वाचन सुरक्षा व्यवस्थापन, मतदान स्थलको सुरक्षा र आकस्मिक योजनाका विषयमा विस्तृत प्रस्तुतीकरण गर्नुभएको थियो। सो अवसरमा कास्कीका मुख्य निर्वाचन अधिकृत, नेपाल प्रहरी र सशस्त्र प्रहरीका डीआईजीहरू तथा प्रमुख जिल्ला अधिकारी लगायतका उच्च पदाधिकारीहरूको उपस्थिति रहेको थियो।
सबै निकायका धारणा सुने पछि प्रधानमन्त्रीले सुरक्षा संयन्त्रलाई उच्च सतर्कतामा राख्न र मतदाताले भयरहित वातावरणमा मतदान गर्न पाउने सुनिश्चितता मिलाउन निर्देशन दिनु भएको छ।
आफ्नो प्रतिकृया दिनुहोस्