४ चैत,जनकपुर । जनकपुरधामका सडकपेटी अतिक्रमण हटाउने अभियानमा मधेश प्रदेशका गृह, सञ्चार तथा कानुन मन्त्री फकिरा महतोले असाधारण सक्रियता देखाएका छन्।
बुधबार बिहानै देखि स्वयं सडकमा उत्रिएका मन्त्री महतोले जनकपुरधाम उपमहानगरपालिका, उद्योग वाणिज्य संघ, धनुषा प्रहरी तथा ट्राफिक प्रहरीसँग समन्वय गर्दै फुटपाथ खाली गराउने कार्यको नेतृत्व गरेका हुन्।
पर्यटकीय नगरीको स्वरूप सुधार्ने स्पष्ट लक्ष्यसहित अघि बढेका मन्त्री महतोले अभियानलाई केवल निर्देशनमा सीमित नराखी प्रत्यक्ष रूपमा कार्यान्वयनमा उत्रिनु उनको कार्यशैलीको विशेषता बनेको छ। मठ–मन्दिर क्षेत्रलाई प्राथमिकता दिँदै उनले फुटपाथमा व्यवसाय गर्दै आएकाहरूलाई वैकल्पिक स्थानमा सर्न आग्रह गरे।
“परिवर्तनका लागि नेतृत्व स्वयं अग्रसर हुनुपर्छ” भन्ने सन्देश दिँदै मन्त्री महतोले स्थानीयवासी, व्यवसायी र नागरिक समाजलाई समेत सहकार्यका लागि आह्वान गरेका छन्। पहिलो दिन नै उनले व्यवसायीहरूसँग नम्रतापूर्वक हात जोडेर सहयोग माग्दै व्यवस्थापन तर्फ ध्यान केन्द्रित गरेका थिए।
त्यसैगरी, उनले चेतावनी समेत स्पष्ट पारेका छन्—भोलिदेखि पनि सडकपेटी अतिक्रमण गरी व्यापार गरेको पाइएमा सामानसहित नियन्त्रणमा लिइनेछ।यस अभियानलाई व्यवस्थित बनाउन उद्योग वाणिज्य संघका अध्यक्ष सुरेन्द्र भण्डारीले फुटपाथ व्यवसायीहरूलाई अस्थायी रूपमा बाह्रविघा मैदानमा स्थानान्तरण गर्ने व्यवस्था मिलाइएको जानकारी दिएका छन्।
गृहमन्त्री महतोको प्रत्यक्ष सक्रियतासँगै जनकपुरधामलाई स्वच्छ, व्यवस्थित र आकर्षक बनाउने अभियानले तीव्रता पाएको देखिएको छ।
आफ्नो प्रतिकृया दिनुहोस्