२० चैत,काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले पूर्व-गृहमन्त्री रमेश लेखकको पक्राउलाई प्रतिशोध र हतारको रूपमा व्याख्या गरिएको प्रति असन्तुष्टि जनाएका छन्।
शुक्रबार प्रतिनिधि सभाको नयाँ सभामुखका लागि उपसभामुख डीपी अर्यालले मनोनयन दर्ता गरेपछि सञ्चारकर्मी सँग कुरा गर्दै उनले यस्तो धारणा व्यक्त गरेका हुन्। लामिछानेले न्यायको पहिलो हक शहीद परिवार र घाइते परिवारको भएको उल्लेख गर्दै पक्राउलाई प्रतिशोधको रूपमा चित्रण गर्नु हतारो हुने बताए।
उनले भने, “गृहमन्त्रीको पक्राउलाई प्रतिशोध भन्नु हतारो हो। आफ्ना सन्तान गुमाएका अभिभावकलाई न्यायको हतारो स्वाभाविक हो। त्यसैले न्याय पाउने पहिलो अधिकार शहीद परिवार र घाइते परिवारको हो, यद्यपि न्याय सबैका लागि बराबर हुनुपर्छ।”
लामिछानेले आफूहरू ‘पब्लिक अडिट’मा रहेको भन्दै नागरिकले सबै गतिविधि नियालिरहेको बताए। “हामी बोलेर होइन, काम गरेर देखाउने पक्षमा छौं,” उनले थपे।यसैबीच, उनले नवनिर्वाचित सभामुखले आफ्नो अनुभवलाई व्यवहारमा उतार्दै संसदीय मर्यादा, नियम र अनुशासनको पालना गर्नुपर्नेमा जोड दिए।
सभामुख पदमा पुगे पछि दलगत स्वार्थ भन्दा माथि उठेर सिंगो सदनप्रति उत्तरदायी हुनुपर्ने उल्लेख गर्दै लोकतान्त्रिक मूल्य मान्यता विपरीत प्रतिपक्षलाई दबाउने वा नागरिकका मुद्दा ओझेलमा पार्ने व्यवहार अस्वीकार्य हुने उनले बताए।
आफ्नो प्रतिकृया दिनुहोस्