अर्थमन्त्री डा. स्वर्णिम वाग्लेलाई कार्यवाहक प्रधानमन्त्रीको जिम्मेवारी; प्रधानमन्त्री शाहले असोज ८ गते महासभालाई सम्बोधन गर्ने
६ असोज,भदौ शुक्ल एकादशी, काठमाडौं । प्रधानमन्त्री वालेन्द्र शाह संयुक्त राष्ट्रसंघको ८१औँ महासभामा सहभागी हुन मंगलबार अमेरिका प्रस्थान गर्दै हुनु हुन्छ। उहाँको अनुपस्थितिमा अर्थमन्त्री डा. स्वर्णिम वाग्लेलाई कार्यवाहक प्रधानमन्त्रीको जिम्मेवारी दिइएको छ। प्रधानमन्त्री शाहले आफ्नो विदेश भ्रमणका क्रममा सरकारको कार्यकारी जिम्मेवारी सम्हाल्ने गरी अर्थमन्त्री वाग्लेलाई कार्यवाहक प्रधानमन्त्री नियुक्त गर्न राष्ट्रपति रामचन्द्र पौडेलसमक्ष सिफारिस गर्नु भएको थियो। उक्त सिफारिसका आधारमा राष्ट्रपति पौडेलले अर्थमन्त्री वाग्लेलाई कार्यवाहक प्रधानमन्त्री तोक्नु भएको हो।
प्रधानमन्त्री शाह संयुक्त राष्ट्रसंघको महासभाको उच्चस्तरीय सत्रमा सहभागी हुन नेपाली प्रतिनिधिमण्डलको नेतृत्व गर्दै अमेरिकाको न्यूयोर्क जान लाग्नु भएको हो। परराष्ट्र मन्त्रालयले सार्वजनिक गरेको विवरण अनुसार प्रधानमन्त्री शाह सेप्टेम्बर २२ मा न्यूयोर्क प्रस्थान गर्ने र सेप्टेम्बर २६ मा स्वदेश फर्कने कार्यक्रम रहेको छ।
प्रधानमन्त्री शाहले संयुक्त राष्ट्रसंघको महासभाको सामान्य बहसमा सेप्टेम्बर २४ अर्थात् नेपाली पात्रो अनुसार असोज ८ गते सम्बोधन गर्ने कार्यक्रम रहेको छ। महासभामा उहाँले नेपालको प्रतिनिधित्व गर्दै अन्तर्राष्ट्रिय समुदाय समक्ष नेपालको धारणा प्रस्तुत गर्नु हुनेछ। भ्रमणका क्रममा जलवायु परिवर्तन, जलवायु न्याय तथा नेपालका प्राथमिकतासँग सम्बन्धित विषयहरू अन्तर्राष्ट्रिय मञ्चमा उठाउने अपेक्षा गरिएको छ।
प्रधानमन्त्री शाहको विदेश भ्रमण अवधिमा अर्थमन्त्री डा. स्वर्णिम वाग्लेले कार्यवाहक प्रधानमन्त्रीको जिम्मेवारी सम्हाल्नु हुनेछ। उहाँले सरकारका नियमित कार्यसम्पादन तथा प्रशासनिक जिम्मेवारीको नेतृत्व गर्नु हुनेछ। प्रधानमन्त्री शाह सेप्टेम्बर २६ अर्थात् असोज १० गते स्वदेश फर्कने कार्यक्रम रहेको छ।
आफ्नो प्रतिकृया दिनुहोस्