२ असोज, भदौ शुक्ल सप्तमी,काठमाडौं ।प्रधानमन्त्री बालेन्द्र शाहले जेन्जी उमेर समूहका सांसदहरूलाई नवीन सोच र सिर्जनात्मक दृष्टिकोणका साथ आफ्नै पुस्ताका लागि स्वदेशमै रोजगारी तथा अवसर सिर्जना गर्न अग्रसर हुन आग्रह गर्नुभएको छ।
सिंहदरबार स्थित प्रधानमन्त्री तथा मन्त्रिपरिषद्को कार्यालयमा आज जेन्जी उमेर समूहका सांसदहरूसँग भएको अन्तरक्रियामा प्रधानमन्त्री शाहले जनजीविकासँग जोडिएका आधारभूत समस्या समाधानमा मात्र सीमित नभई त्यस बाट एक कदम अगाडि बढेर युवा पुस्तालाई आत्मनिर्भर बनाउने वातावरण निर्माणमा सक्रिय भूमिका निर्वाह गर्न आह्वान गर्नु भएको हो।
प्रधानमन्त्री शाहले यसका लागि स्थलगत अध्ययन तथा अनुसन्धानलाई प्राथमिकता दिन, सूचना–प्रविधिको अधिकतम उपयोग गर्न, समस्या पहिचानसँगै समाधान खोज्ने व्यवहार विकास गर्न तथा पुराना र अव्यावहारिक सोच एवं कार्यशैलीबाट बाहिर निस्कन सुझाव दिनु भएको छ।
उहाँले राजनीतिलाई मात्र आयआर्जनको माध्यम नबनाई सांसद तथा युवा राजनीतिज्ञहरूले आफ्नो छुट्टै व्यावसायिक तथा पेशागत आधार निर्माण गर्नु पर्नेमा समेत जोड दिनु भएको छ। आफ्नो पेशा, व्यवसाय वा उद्यम मार्फत आत्मनिर्भर बन्दै दीर्घकालीन रूपमा समाजका लागि उदाहरण र प्रेरणाको स्रोत बन्न उहाँले आग्रह गर्नु भएको छ।
अन्तरक्रियामा सहभागी जेन्जी उमेर समूहका सांसदहरूले प्रधानमन्त्री शाहको सुझावलाई अभिभावकीय मार्गदर्शनका रूपमा लिएको बताउँदै युवा पुस्तालाई आत्मनिर्भर बनाउने र स्वदेशमै रोजगारी तथा अवसर सिर्जना गर्ने अभियानमा सक्रिय रूपमा लाग्ने प्रतिबद्धता व्यक्त गर्नुभएको छ।
सांसदहरूले नयाँ पुस्ताका आवश्यकता र आकांक्षालाई केन्द्रमा राखेर रोजगारी, उद्यमशीलता, प्रविधि तथा आत्मनिर्भरताका क्षेत्रमा ठोस पहल अघि बढाउनुपर्ने धारणा पनि राख्नु भएको थियो।(फोटो : pmo nepal)
आफ्नो प्रतिकृया दिनुहोस्