२१ भदौ, कृष्ण दशमी,काठमाडौं : प्रधानमन्त्री बालेन्द्र शाहले हालैको भीषण बाढी र पहिरोको विपद्मा अहोरात्र खटिएका नेपाली सुरक्षाकर्मीहरूको उच्च प्रशंसा गर्नुभएको छ। सामाजिक सञ्जाल मार्फत एक सन्देश जारी गर्दै प्रधानमन्त्री शाहले कठिन भूगोल र प्रतिकूल मौसमका बाबजुद सुरक्षाकर्मीहरूले देखाएको अदम्य साहस र त्यागको खुलेर प्रशंसा गर्नुभएको हो।
नुवाकोट कारागारको साहसिक उद्धार प्रधानमन्त्री शाहले नुवाकोटको विदुर स्थित केन्द्रीय कारागारको उदाहरण दिँदै सुरक्षाकर्मीको दृढताको चर्चा गर्नुभएको छ। भदौ १० गते भोटेकोशीमा आएको बाढीले कारागार क्षेत्र डुबानमा पर्दा त्यहाँ कार्यरत ५२ जना सुरक्षाकर्मीले धैर्य नगुमाई ९२३ जना कैदीबन्दीलाई सुरक्षित स्थानमा सारेका थिए।
सोही क्रममा भाग्न खोज्ने ५० जना कैदीलाई पुन: नियन्त्रणमा लिनुका साथै स्थानीय बासिन्दाको समेत ज्यान बचाउन सुरक्षाकर्मीहरू सफल भएका थिए। ब्यारेक र कार्यालय नै लेदोले पुरिए पनि उनीहरूले आफ्नो जिम्मेवारीबाट पछि नहटी कर्तव्य निर्वाह गरिरहेको प्रधानमन्त्री शाहले उल्लेख गर्नुभएको छ।
सुरक्षा निकायको संयुक्त प्रयास प्रधानमन्त्री शाहका अनुसार नेपाली सेना, नेपाल प्रहरी र सशस्त्र प्रहरी बलको संयुक्त प्रयासबाट अहिलेसम्म १३ हजार ३९१ जनाको उद्धार गरिएको छ। उहाँले तीनवटै सुरक्षा निकायको योगदानको विवरण यसरी दिनु भएको छ:
नेपाली सेना: ९ हजार २८७ जना जनशक्ति परिचालन गरी खोज, उद्धार, बेलीब्रिज निर्माण र प्राविधिक सहयोगमा नेतृत्व गरिरहेको छ।
नेपाल प्रहरी: ७ हजार ९७५ जना प्रहरी मार्फत खोज, उद्धार, राहत वितरण, शव व्यवस्थापन र शान्ति सुरक्षा कायम राख्न सक्रिय छ।
सशस्त्र प्रहरी बल: ४ हजार २०२ जना सुरक्षाकर्मी मार्फत गोताखोर, डोरी टोली, ड्रोन स्क्वाड र विपद् प्रतिकार्य बेस स्थापना गरी जोखिमपूर्ण उद्धारमा खटिएको छ।
पीडा लुकाएर कर्तव्यपथमा आफ्नै सहकर्मीहरू (४५ सैनिक, २५ प्रहरी र १२ सशस्त्र प्रहरी) सम्पर्कविहीन हुँदाको पीडामा रहेका सुरक्षाकर्मीहरूले समेत आफ्नो दु:ख भुलेर उद्धारमा खटिएको भन्दै प्रधानमन्त्री शाहले भावुक श्रद्धा व्यक्त गर्नु भएको छ। “तपाईंहरूको त्याग र निष्ठाका कारण नै आज संकटको बेला लाखौँ मानिसले सुरक्षित महसुस गर्न पाएका छन्,” उहाँले भन्नुभएको छ।
अन्तमा, प्रधानमन्त्री शाहले सुरक्षाकर्मीको सेवा, सुरक्षा र सुविधामा सरकारले कुनै सम्झौता नगर्ने प्रतिबद्धता जनाउँदै संकटको घडीमा उनीहरूलाई साथ दिने परिवारप्रति समेत कृतज्ञता ज्ञापन गर्नुभएको छ।
आफ्नो प्रतिकृया दिनुहोस्