१६ भदौ,महोत्तरी : रसुवाको भोटेकोशी नदीमा आएको विनाशकारी बाढीले पुर्याएको क्षतिको व्यवस्थापन र राहतका लागि महोत्तरीको मटिहानी नगरपालिकाले सहयोगको हात बढाएको छ। नगरपालिकाले प्रधानमन्त्री दैवीप्रकोप उद्धार कोषमा रु. ५ लाख रुपैयाँ जम्मा गर्ने निर्णय गरेको हो।
नगर प्रमुख हरि प्रसाद मण्डलको अध्यक्षतामा बसेको कार्यपालिका बैठकले बाढी-पीडितको सहयोगार्थ उक्त रकम हस्तान्तरण गर्ने निर्णय गरेको हो। बैठकले बाढीका कारण ज्यान गुमाएका नागरिकहरू प्रति भावपूर्ण श्रद्धाञ्जली अर्पण गर्दै शोकसन्तप्त परिवारजनमा समवेदना व्यक्त गरेको छ। साथै, विपत्तिमा परी घाइते भएकाहरूको शीघ्र स्वास्थ्यलाभको कामनासमेत गरिएको छ।
यसै बीच, बाढीका क्रममा बेपत्ता भएका मटिहानी नगरपालिका वडा नं. ७ निवासी ४० वर्षीय गंगाराम मण्डलको खोजी तथा उद्धारका लागि नगरपालिकाले तीव्रता दिएको छ। कार्यपालिका बैठकले मण्डलको शीघ्र खोजी र उद्धार कार्यमा पूर्ण सहयोग पुर्याउन सम्बन्धित सम्पूर्ण सुरक्षा निकाय तथा स्थानीय प्रशासन सँग जोडदार आग्रह गरेको छ।
आफ्नो प्रतिकृया दिनुहोस्