१५ भदौ ,कृष्ण तृतिया,(आशिष कुमार मण्डल),जनकपुरधाम : भोटेकोशी र त्रिशूली नदीमा आएको भीषण बाढी तथा लेदो (Flash Flood) बाट प्रभावित भएका नागरिकका लागि जनकपुरधाम उपमहानगरपालिकाले राहत सहयोगको घोषणा गरेको छ। गत आइतबारको अविरल वर्षापछि आएको अकल्पनीय बाढीले पुर्याएको क्षतिको सामना गरिरहेका पीडित परिवारहरूका लागि उपमहानगरपालिकाले तत्काल ६ लाख २५ हजार रूपैयाँ बराबरको ३०० बोराको हाराहारीमा चामल उपलब्ध गराउने निर्णय गरेको हो।
हालै आएको उक्त भीषण विपत्तिका कारण मुख्यगरी देहायका जिल्ला र क्षेत्रहरू अति प्रभावित बनेका छन्:
रसुवा जिल्ला: टिमुरे, रसुवागढी, स्याफूबेसी, हाकुबेसी, मैलुङ र शान्तिबजार क्षेत्र।
नुवाकोट जिल्ला: बेत्रावती, त्रिशूली बजार र नदी किनारका तटीय बस्तीहरू।
धादिङ जिल्ला: त्रिशूली नदी आसपासका तटीय क्षेत्रहरू।
गोर्खा र चितवन जिल्ला: त्रिशूली र नारायणी नदी तटीय क्षेत्रका तल्लो भागहरू।
अचानक आएको बाढीले ती क्षेत्रमा कैयौँ घरपरिवार विस्थापित हुनुका साथै ठूलो भौतिक क्षति पुर्याएको छ। संकटको यस घडीमा मधेस प्रदेशको जनकपुरधाम उपमहानगरपालिकाले ऐक्यबद्धता जनाउँदै राहतको प्रबन्ध मिलाएको हो।
सहयोग बारे जानकारी दिँदै जनकपुरधाम उपमहानगरपालिकाका प्रमुख मनोज कुमार साहले बाढीपीडितको साथमा उपमहानगरपालिका रहेको बताए। “आइतबार आएको अकल्पनीय र भयङ्कर विपत्तिले धेरै परिवारलाई प्रभावित बनाएको छ,” नगर प्रमुख साहले भने, “विपत्तिमा परेका पीडितहरूलाई तत्काल खाद्यान्नको समस्या नहोस् भन्नका लागि उपमहानगरपालिकाका तर्फबाट करिब ३०० बोरा (साढे ६ लाख रूपैयाँ बराबरको) चामल प्रदान गर्ने निर्णय गरेका छौँ।”
नगर प्रमुख साहले विपत्तिको समयमा सबै क्षेत्र, संघ-संस्था तथा नागरिकहरूलाई एकबद्ध भई राहत र उद्धारमा जुट्न अपिल समेत गरेका छन्। उपमहानगरपालिकाले प्रभावित क्षेत्रको स्थलगत अनुगमन गरी वास्तविक बाढीपीडितहरू सम्म शीघ्र सहायता पुर्याउने प्रतिबद्धता जनाएको छ।
आफ्नो प्रतिकृया दिनुहोस्