१४ भदौ कृष्ण द्वितीया,काठमाडौँ। प्रधानमन्त्री बालेन्द्र शाह (बलेन) ले रसुवाको भोटेकोशी नदीमा आएको भीषण बाढी र त्यस पछिको उद्धार तथा राहत कार्यका बारेमा सामाजिक सञ्जाल मार्फत विस्तृत विवरण सार्वजनिक गर्नु भएको छ। विगत ५ दिन देखि देशले सामना गरिरहेको अकल्पनीय प्राकृतिक विपद्को घडीमा सरकार सम्पूर्ण राज्य संयन्त्रलाई युद्धस्तरमा परिचालन गरी नागरिकको जीवनरक्षामा खटिएको उहाँले स्पष्ट पार्नु भएको छ।
प्रधानमन्त्रीले सामाजिक सञ्जालमा लेख्दै प्रतिकूल मौसम र जटिल भूगोलका बाबजुद हाल सम्म ९,४३५ जनाको सफलतापूर्वक उद्धार गरिएको जानकारी दिनुभएको छ। राहत तथा उद्धारका लागि हाल सम्म ३९४ उडान भरिएको र सेना, प्रहरी तथा सशस्त्र प्रहरी गरी २०,६१८ जना सुरक्षाकर्मी परिचालन गरिएको छ।
जलविद्युत् आयोजना र सुरुङमा उद्धार कार्य जारी
विभिन्न जलविद्युत् आयोजनाका सुरुङ तथा प्रभावित क्षेत्रमा अड्किएका मानिसहरूको खोजीका लागि विदेशी विशेषज्ञ टोलीहरू सँगको समन्वयमा काम भइरहेको छ। माथिल्लो त्रिशूली–१, ३ ‘ए’, ३ ‘बी’, चिलिमे, लाङटाङ र मैलुङ खोला आयोजनाहरूमा नेपाली सेना, चिनियाँ, कोरियन तथा भारतीय विशेषज्ञ टोलीहरूले ‘ब्लास्टिङ’, हवाई रेकी र पम्पको प्रयोग गरी अहोरात्र उद्धार प्रयास जारी राखेका छन्।
उपचार, आर्थिक सहयोग र राहत व्यवस्थापन
बाढीमा घाइते भएका २६७ जनामध्ये १५६ जना उपचारपछि घर फर्किसकेका छन् भने बाँकीको काठमाडौँका विभिन्न अस्पतालमा उपचार भइरहेको छ।
कोषमा रकम जमा: प्रधानमन्त्री राहत कोषमा ५ अर्ब २४ करोड ७९ लाख भन्दा बढी रुपैयाँ र २१ लाख अमेरिकी डलर जम्मा भइसकेको छ।
आश्रयस्थल: रसुवा र नुवाकोटमा २६ वटा आश्रयस्थल र राहत वितरण केन्द्रमार्फत ३,४५४ जनाले राहत पाएका छन्।
अन्तर्राष्ट्रिय सहायता: विश्व बैंक (१६७ मिलियन डलर सहुलियतपूर्ण कर्जा), एडीबी, अमेरिका, अस्ट्रेलिया, भारत, चीन र स्विट्जरल्यान्डबाट नगद, बेलीब्रिज र मानवीय सामग्री प्राप्त भएका छन्।
सञ्चार, सडक र शव व्यवस्थापन
अवरुद्ध भएका अधिकांश टेलिकम र एनसेलका टावरहरू पुनः सञ्चालनमा ल्याइएको छ भने प्रभावित क्षेत्रमा २० वटा स्याटलाइट फोन पठाइएको छ। पहिरो र कटानका कारण अवरुद्ध वैकल्पिक सडक खुलाउने प्रयास भइरहेको छ।
बाढीमा परी हालसम्म ७८१ जनाको शव फेला परेको र पहिचान हुन नसकेका शवहरूको ‘पहिचान नभएका तथा बेवारिसे शव व्यवस्थापन निर्देशिका, २०८३’ बमोजिम डिएनए नमूना सुरक्षित राखी व्यवस्थापन भइरहेको प्रधानमन्त्री शाहले उल्लेख गर्नुभएको छ। विपद्को यस घडीमा सरकार नागरिकको अभिभावक बनेर पुनर्निर्माण र पुन:स्थापनाको काम नसकिए सम्म निरन्तर लागि पर्ने प्रतिबद्धता उहाँले व्यक्त गर्नु भएको छ।
आफ्नो प्रतिकृया दिनुहोस्