१० भदौ,साउन शुक्ल त्रयोदशी,(आशिष कुमार मण्डल),जनकपुरधाम। जनकपुरधामका ऐतिहासिक पोखरी तथा गुठीको जग्गा अतिक्रमणमुक्त गराउने उद्देश्यले सुरु गरिएको अभियान यतिबेला तीव्र विवाद र विरोधाभासको घेरामा परेको छ। गुठी संस्थान जनकपुरधामले साउन १ गते जारी गरेको सूचना र भदौ ५ गतेको माइकिङलाई पछ्याउँदै शनिबार बिहानै देखि गोरधोइ पोखरी क्षेत्रमा डोजर चलाएर संरचना भत्काउन थाले पछि विरोध चर्किएको हो।
अतिक्रमण हटाउने क्रममा साना र गरिबका टहराहरू प्राथमिकताका साथ ध्वस्त पारिँदा विपन्न वर्ग बिचल्लीमा परेका छन् भने सोही क्षेत्रमा रहेका ठूला र पक्की महलहरूलाई विभिन्न बहानामा उन्मुक्ति दिइएको स्थानीयको गम्भीर आरोप छ।
यस कार्यशैलीले अभियानको निष्पक्षतामाथि नै ठूलो प्रश्नचिह्न खडा गरेको छ। स्थानीयवासी तथा सरोकारवालाहरूले गुठी संस्थानसँग तत्काल निम्न विषयमा स्पष्ट र आधिकारिक तथ्यांक सार्वजनिक गर्न कडा माग गरेका छन्
कुल अतिक्रमित क्षेत्रफल: गोरधोइ पोखरी लगायत वरपरका गुठीका जग्गामध्ये कुल कति क्षेत्रफल (कट्ठा/बिघा) अतिक्रमणमा परेको हो?
हालसम्म खाली गराइएको जग्गा: हालसम्म सञ्चालन गरिएको डोजर कारबाहीबाट कति क्षेत्रफल जग्गा वास्तविक रूपमा अतिक्रमणमुक्त भयो?
खाली गराउन बाँकी क्षेत्रफल: अझै कति जग्गा अतिक्रमणमै छ र त्यसमा कुन-कुन साना वा ठूला संरचनाहरू खडा छन्?
प्रशासनिक अपारदर्शिता र ‘सानालाई ऐन, ठूलालाई चैन’ जस्तो दोहोरो मापदण्डका कारण स्थानीय स्तरमा आक्रोश बढ्दै गएको छ। कुन नापी र सीमांकनका आधारमा भत्काउने काम भइरहेको हो भन्ने बारे गुठी संस्थान र सम्बन्धित निकायले श्वेतपत्र वा यकिन तथ्यांक तत्काल सार्वजनिक नगरे सम्म यो विवाद अझ साम्य हुने देखिँदैन।
स्थानीयले निष्पक्ष छानबिन गरी ठूला महल तथा पहुँचवालाहरूका अवैध संरचना माथि पनि बिना कुनै भेदभाव डोजर चलाउन र गरिब-विपन्नका लागि उचित विकल्प वा व्यवस्थापनको पहल गर्न माग गरेका छन्।
आफ्नो प्रतिकृया दिनुहोस्