६ भदौ,मधेश प्रदेश,(आशिष कुमार मण्डल): पछिल्लो समय भान्छामा प्रयोग हुने एलपीजी ग्यास सिलिन्डर चुहावट भई आगलागी तथा विस्फोट हुने घटनाहरू निरन्तर बढ्दै गएका छन्। यस्ता दुर्घटनाले क्षणभरमै परिवारको खुसी र सर्वस्व छाने मात्र गर्दैन, गम्भीर जनधनको क्षति समेत पुर्याउँछ।
तर अधिकांश नागरिकलाई दुर्घटना पछिका कानुनी अधिकार, बीमा सुविधा र प्राविधिक छानबिन प्रक्रिया बारे जानकारी नहुँदा उनीहरू उचित क्षतिपूर्ति पाउनबाट वञ्चित भइरहेका छन्।नेपाल आयल निगमको नियमावली अनुसार प्रत्येक ग्यास बोटलिङ कम्पनीले अनिवार्य रूपमा थर्ड पार्टी दायित्व बीमा गरेका हुन्छन्। सिलिन्डरको बनावटमा त्रुटि, ग्यास चुहावट वा कम्पनीको कुनै पनि लापरबाहीका कारण दुर्घटना भएमा पीडित परिवारले बीमा कम्पनी मार्फत क्षतिपूर्ति पाउने स्पष्ट कानुनी व्यवस्था छ।
अक्सर आगलागी पछि सबै सामान जलेर नष्ट हुने भएकाले दुर्घटनाको कारण पत्ता लाग्दैन भन्ने भ्रम आममानिसमा पाइन्छ। तर नेपाल प्रहरीको फरेन्सिक टोली, बीमा सर्भेयर र प्राविधिकहरूले धातुको बनोट, पित्तलको भल्भ, रेगुलेटरको स्थिति र विस्फोटको ढाँचा अध्ययन गरी दुर्घटना ग्यासको प्राविधिक गडबडीले भएको हो या मानवीय लापरबाहीले भन्ने तथ्य वैज्ञानिक रूपमा पत्ता लगाउँछन्।
उपभोक्ता संरक्षण ऐन, २०७५ ले प्रत्येक नागरिकलाई गुणस्तरीय वस्तु प्रयोग गर्ने र दोषपूर्ण उत्पादनका कारण क्षति भएमा क्षतिपूर्ति पाउने अधिकार सुनिश्चित गरेको छ। दुर्घटना भइहालेमा अत्तालिनुको सट्टा तुरुन्तै घटनास्थलको तस्बिर तथा भिडियो खिचेर राख्नु पर्छ। लगत्तै प्रहरीलाई खबर गरी घटनास्थल मुचुल्का तयार पार्ने, सम्बन्धित ग्यास डीलर र कम्पनीलाई लिखित जानकारी गराउने तथा जिल्ला प्रशासन कार्यालयमा निवेदन दिने प्रक्रिया थाल्नु पर्छ। आफ्नै घरको सम्पत्ति बीमा गरिएको छ भने बीमा कम्पनीलाई पनि तत्काल सूचित गर्नु पर्छ। (ग्यास प्रयोग गर्दा सुँघेर वा साबुनको पानी लगाएर चुहावट नियमित जाँच गरौँ, गुणस्तरीय पाइप र रेगुलेटर मात्र प्रयोग गरौँ र सम्भावित दुर्घटनाबाट आफू र आफ्नो परिवारलाई सुरक्षित राखौँ।)
आफ्नो प्रतिकृया दिनुहोस्