२४ पुष,जनकपुरधाम : व्याहुत सेवा समिति (कलवार कुट्टी), जनकपुरधामको आगामी नेतृत्व चयनका लागि यही माघ ३ गते हुन गइरहेको निर्वाचनमा शंकर साहले अध्यक्ष पदका लागि आफ्नो उम्मेदवारी दर्ता गराएका छन्।
स्वजातीय संस्थाको उत्थान, एकता र सुदृढीकरणलाई मुख्य उद्देश्य बनाउँदै साहले अध्यक्ष पदमा उम्मेदवारी दिएको बताएका छन्। उनले व्याहुत समाजको सामाजिक, सांस्कृतिक तथा संस्थागत विकासका लागि आफू प्रतिबद्ध रहेको उल्लेख गर्दै सम्पूर्ण आदरणीय स्वजातीय दाजुभाइ तथा दिदी-बहिनीहरूबाट सहयोग र समर्थनको अपेक्षा व्यक्त गरेका छन्।
शंकर साह यस अघि व्याहुत सेवा समितिमा कोषाध्यक्ष पदमा रहेर कार्य गरिसकेका अनुभवी व्यक्ति हुन्। संस्थाभित्र आर्थिक व्यवस्थापन र संगठनात्मक कार्यमा उनले खेलेको भूमिकालाई समाजका धेरै सदस्यहरूले सकारात्मक रूपमा लिएका छन्। यसका साथै उनी हाल प्रकाशक महासंघ नेपालका अध्यक्षको जिम्मेवारीमा समेत रहेका छन् भने जनकपुर जेसीजको उपाध्यक्ष पदमा रहेर पनि सफलतापूर्वक कार्य गरिसकेका छन्।
पछिल्लो निर्वाचनमा समेत उनले अध्यक्ष पदका लागि उम्मेदवारी दिएका थिए। तर त्यस बेला पर्याप्त पूर्व-तयारी बिना उम्मेदवारी दिएकाले पराजय भोग्नु परेको अनुभव उनले सार्वजनिक गरेका छन्। यस पटक भने पूर्व अध्यक्षहरू तथा स्वजातीय अगुवाहरू सँग व्यापक सल्लाह, समन्वय र समर्थन जुटाएर उम्मेदवारी दिने निर्णय गरेको उनले बताएका छन्।
यस कारण यस पटकको निर्वाचनमा आफ्नो जित सुनिश्चित हुनेमा आफू विश्वस्त रहेको शंकर साहको भनाइ छ। व्याहुत सेवा समितिको नेतृत्वका लागि माघ ३ गते हुने निर्वाचनलाई समाजले चासोका साथ हेरिरहेको छ।
आफ्नो प्रतिकृया दिनुहोस्