७ साउन,जनकपुरधाम । उपप्रधानमन्त्री तथा शहरी विकास मन्त्री प्रकाशमान सिंहले जनकपुरधामको समुचित विकासमा शहरी विकास मन्त्रालय पूर्ण रूपले प्रतिबद्ध रहेको बताएका छन्।
बुधबार जनकपुरधामस्थित सीता पुष्पवाटिका (मणिमण्डप) को नयाँ भवन उद्घाटन समारोहमा बोल्दै मन्त्री सिंहले ऐतिहासिक र धार्मिक महत्व बोकेका संरचनाहरू निर्माण मार्फत मन्त्रालयले जनकपुरधामको विकासमा योगदान दिँदै आएको जानकारी दिए।
“जनकपुर सिता माता र भगवान रामको विवाह स्थल हो,” उनले भने, “यसलाई विश्वस्तरमा धार्मिक पर्यटन गन्तव्य तथा ‘म्यारेज डेस्टिनेसन’को रूपमा विकास गर्नु जरुरी छ।”
धार्मिक तथा पर्यटकीय स्थलहरूको प्रचार-प्रसार नेपाल र भारतमा मात्र सीमित नराखी विश्वभर फैलाउनु पर्नेमा उनले जोड दिए। साथै, त्यसका लागि आवश्यक भौतिक संरचना र सुविधा विस्तारमा सरकारले थप सक्रियता देखाउने उनले उल्लेख गरे।
मणिमण्डपको निर्माण शहरी विकास मन्त्रालयले गरेको भए तापनि यसको संरक्षणमा स्थानीयवासी र स्थानीय तहको भूमिका अत्यन्त महत्त्वपूर्ण रहेको मन्त्री सिंहले बताए।उक्त उद्घाटन कार्यक्रममा मधेश प्रदेशका मुख्यमन्त्री सतिश कुमार सिंह ,सचिव गोपाल प्रसाद सिग्देल ,विभागका महानिर्देशक मचाकाजि महर्जन, संघीय शहरी विकास तथा भवन निमार्ण कार्यालयका निमित प्रमुख विनोद यादव समेतको उपस्थिति रहेको थियो ।
आफ्नो प्रतिकृया दिनुहोस्