१९ साउन,काठमाडौं । खानेपानी मन्त्री प्रदीप यादवले बोलबम सहितका मौलिक धार्मिक परम्पराहरूको जगेर्ना र प्रवर्द्धनमा पूर्ण प्रतिबद्धता व्यक्त गरेका छन्।
काठमाडौंको गोकर्णेश्वर नगरपालिका–१, ओख्रेनीमा बोलबम काँवरीया संघद्वारा आयोजित २९औं श्रावणी मेला तथा काँवर यात्रा उद्घाटन समारोहलाई सम्बोधन गर्दै मन्त्री यादवले बोलबम संस्कृति हाम्रो सांस्कृतिक एकता र धार्मिक आस्थाको प्रतीक भएको बताए।
उनले भने, “बोलबम संस्कृति समाजलाई एकताबद्ध बनाउने, धार्मिक चेतना मजबुत गर्ने र सांस्कृतिक विविधतालाई जोड्ने माध्यम हो। यसको संरक्षण र निरन्तरता सरकारले प्राथमिकतामा राखेको छ।”मन्त्री यादवले यस्ता धार्मिक, सांस्कृतिक र पर्यटकीय कार्यक्रमहरू हाम्रो पहिचानलाई सुदृढ बनाउने महत्वपूर्ण माध्यम भएको उल्लेख गर्दै सबै तह र वर्गको साझा जिम्मेवारी अन्तर्गत यसको प्रवर्द्धन आवश्यक रहेको बताए।
पशुपतिनाथलाई हिन्दु आस्थाको धरोहर बताउँदै उनले बोलबम काँवर यात्रीहरूलाई सहज रूपमा जल चढाउन सकिने वातावरण बनाउन पशुपति क्षेत्र विकास कोष, पर्यटन मन्त्रालय र अन्य निकायसँग समन्वय गर्ने आश्वासन पनि दिए।
उनका अनुसार नेपाल भरिका विभिन्न शिवालयहरूमा श्रावण महिनामा काँवरिया भक्तजनहरूले गर्ने विशेष पूजापाठ र साधनाले मौलिक संस्कारको समृद्धि र निरन्तरता कायम राख्न महत्त्वपूर्ण योगदान पुर्याउँदै आएको छ।
आफ्नो प्रतिकृया दिनुहोस्