(आशिष कुमार मण्डल),१३ फागुन ,काठमाडौं । नेपालमा गत वर्ष भएका युवाहरूको ठूलो विरोध प्रदर्शन पछि देशको राजनीतिमा सबैभन्दा बढी चर्चामा रहेका नेताहरू मध्ये काठमाडौँका पूर्व मेयर बालेन्द्र (बालेन) शाहको नाम अग्रपङ्क्तिमा आएको छ। आगामी निर्वाचनमा उनलाई भावी प्रधानमन्त्रीको सबैभन्दा बलियो उम्मेदवारका रूपमा हेरिन थालिएको छ।
नेपालमा केपी शर्मा ओली नेतृत्वको सरकार ढलेपछि आगामी फागुन २१ गते (मार्च ५) का लागि आम निर्वाचन तय भएको छ। यस चुनावमा नेपाल मात्र नभई अन्तर्राष्ट्रिय समुदायको ध्यान खिच्ने मुख्य पात्र बालेन शाह बनेका छन्। भारतमा इन्जिनियरिङ अध्ययन गरेका र र्याप सङ्गीतबाट चर्चामा आएका बालेन अहिले प्रधानमन्त्री पदका लागि सबैभन्दा लोकप्रिय अनुहार बनेको विभिन्न सर्वेक्षणहरूले देखाएका छन्।
रोयटर्सका अनुसार बालेनले पछिल्लो तीन वर्षमा नेपाली राजनीतिमा तीव्र प्रगति गरेका छन्। सन् २०२२ मा काठमाडौँको मेयर बनेर राजनीतिमा धमाकेदार प्रवेश गरेका शाह, आसन्न निर्वाचन पछि देशको कार्यकारी प्रमुख बन्ने दौडमा सबैभन्दा अगाडि देखिएका हुन्।
नेपालको राजनीतिमा कुनै भरपर्दो ओपिनियन पोल नभए पनि राजनीतिक विश्लेषक र स्थानीय सञ्चारमाध्यमहरूले बालेनलाई परम्परागत राजनीतिक ‘एलिट’ वर्गलाई पाखा लगाउन सक्ने शक्तिका रूपमा चित्रण गरेका छन्। काठमाडौँ विश्वविद्यालयका प्राध्यापक बिपिन अधिकारीका अनुसार बालेनको लोकप्रियता यति उच्च छ कि सार्वजनिक यातायातका साधनहरूमा उनकै समर्थनका पोस्टरहरू देखिनु सामान्य भइसकेको छ। बालेन सत्तामा आउनु भनेको परम्परागत दलहरूको दबदबा रहेको नेपाली राजनीतिमा नयाँ युगको सुरुवात हुनु हो।
बालेनको लोकप्रियताको मुख्य आधार काठमाडौँको मेयर हुँदा उनले गरेका सुधारका कामहरू हुन्। सहरी पूर्वाधार, फोहोर व्यवस्थापन र स्वास्थ्य सेवामा उनले पुर्याएको योगदानले जनतामा ठूलो विश्वास जगाएको छ। निर्वाचनमा होमिने तयारी स्वरूप उनले माघ महिनामा मेयर पदबाट राजीनामा दिएका थिए।
अन्य नेताहरू जस्तो मूलधारका सञ्चारमाध्यम र पत्रकार सम्मेलनमा भर पर्नुको साटो बालेनले सामाजिक सञ्जाललाई आफ्नो मुख्य हतियार बनाएका छन्। लाखौँ फलोअर्स रहेका बालेनले छोटा र प्रभावकारी सन्देश मार्फत युवाहरूसँग प्रत्यक्ष संवाद गर्ने गरेका छन्।
एक मध्यमवर्गीय परिवारमा जन्मिएका बालेनले नेपालबाट सिभिल इन्जिनियरिङ र दक्षिण भारतबाट स्ट्रक्चरल इन्जिनियरिङमा स्नातकोत्तर गरेका छन्। यद्यपि, उनलाई सुरुवाती पहिचान भने र्याप सङ्गीतले नै दिलाएको हो।
गत पुस (डिसेम्बर) मा रवि लामिछाने नेतृत्वको राष्ट्रिय स्वतन्त्र पार्टी (रास्वपा) मा आबद्ध भएका बालेनलाई पार्टीले प्रधानमन्त्रीको उम्मेदवारका रूपमा अघि सारेको छ। रास्वपाले १२ लाख रोजगारी सिर्जना गर्ने, वैदेशिक पलायन रोक्ने र अर्थतन्त्र सुधार्ने जस्ता ठूला बाचाहरूका साथ जनतामाझ जाने तयारी गरेको छ।
आफ्नो प्रतिकृया दिनुहोस्