२९ फागुन,जनकपुरधाम। खाना पकाउने ग्यासको आपूर्ति व्यवस्थापनलाई सहज बनाउन नेपाल आयल निगम लिमिटेडले आजदेखि ग्यास सिलिण्डर आधा भरेर बिक्री गर्ने निर्णय गरेको छ।
निगमले बिहीबार जारी गरेको प्रेस विज्ञप्ति अनुसार हालको परिस्थितिलाई ध्यानमा राख्दै अर्को निर्णय नभए सम्म प्रत्येक ग्यास सिलिण्डरमा ७.१ केजी एलपी ग्यास भरेर प्रति सिलिण्डर ९५५ रुपैयाँमा बिक्री–वितरण गरिने छ।
निगमका अनुसार माग अनुसार नियमित रूपमा ग्यास आयात र वितरण भइरहेको भए पनि पछिल्ला दुई–तीन महिना देखि काठमाडौं उपत्यकामा ग्यासको माग उल्लेखनीय रूपमा बढेको छ। यसैबीच मध्यपूर्व क्षेत्रमा जारी युद्धका कारण विश्व बजारमा पेट्रोलियम पदार्थ तथा एलपी ग्यासको आपूर्तिमा दबाब परेको बताइएको छ।
नेपाललाई ग्यास आपूर्ति गर्ने भारतमा समेत सर्वसाधारणलाई ग्यास प्राप्त गर्न कठिनाइ भएको समाचार सार्वजनिक भएपछि नेपालमा पनि आवश्यकता भन्दा बढी ग्यास खरिद गरी भण्डारण गर्ने प्रवृत्ति बढेको निगमले जनाएको छ।
निगमका प्रवक्ता मनोज ठाकुरले उपभोक्तालाई आवश्यकता अनुसार मात्रै ग्यास खरिद गर्न आग्रह गर्दै आपूर्ति व्यवस्थालाई सहज बनाउन असहयोग नगर्न अनुरोध गरेका छन्।
आफ्नो प्रतिकृया दिनुहोस्