४ चैत,काठमाडौं । इला होटल एण्ड रिसोर्टको प्रमुख कार्यकारी अधिकृत (CEO) मा लक्ष्मण थापा नियुक्त भएका छन्। आइएमई हस्पिटालिटीको सञ्चालक समितिले चैत ५ गते देखि लागू हुनेगरी थापालाई उक्त जिम्मेवारी दिएको हो।
आतिथ्य व्यवस्थापन क्षेत्रमा दुई दशक भन्दा बढी अनुभव बोकेका थापाले नेपाल सहित भानुआतु, माल्दिभ्स, मलेसिया, संयुक्त अरब इमिरेट्स र साउदी अरब जस्ता विभिन्न देशका प्रतिष्ठित होटल, रिसोर्ट तथा क्यासिनोमा नेतृत्वदायी भूमिका निर्वाह गरिसकेका छन्।
आइएमई हस्पिटालिटीमा आवद्ध हुनुअघि उनी सिद्धार्थ हस्पिटालिटी समूहमा प्रमुख सञ्चालन अधिकृत (COO) का रूपमा कार्यरत थिए। त्यहाँ रहँदा उनले ३० भन्दा बढी होटल, रिसोर्ट, क्याफे र इभेन्ट भेन्यूहरूको सञ्चालन सफलतापूर्वक नेतृत्व गरेका थिए।
यस अघि थापाले काठमाडौंको होटल याक एण्ड यति, भानुआतुको इरिरिकी आइल्यान्ड रिसोर्ट एण्ड ज्वेल क्यासिनो, चितवनको सिजी हस्पिटालिटी र भैरहवाको टाइगर प्यालेस रिसोर्टमा पनि विभिन्न उच्च व्यवस्थापकीय भूमिकामा काम गरेका छन्। साथै, मेरिडियन दुबई, द वेस्टिन लाङकावी, सेराटन माल्दिभ्स, अलोफ्ट अबुधाबी र रोजवुड जेद्दाह जस्ता अन्तर्राष्ट्रिय ब्रान्डहरूसँगको अनुभव समेत उनले हासिल गरेका छन्।
कम्पनीका अनुसार थापाको अन्तर्राष्ट्रिय अनुभव र नेतृत्व क्षमताले सेवा गुणस्तर अभिवृद्धि तथा व्यवस्थापन सुदृढीकरणमा महत्वपूर्ण योगदान पुग्ने विश्वास गरिएको छ।आइएमई हस्पिटालिटीले लाजिम्पाटस्थित होटल ले हिमालय, पोखराको लेकसाइड रिट्रिट, बागलुङ र गैँडाकोटस्थित होटल इला लगायत विभिन्न होटल तथा रिसोर्टहरूको व्यवस्थापन गर्दै आएको छ।
यो आइएमई ग्रुप अन्तर्गत आतिथ्य क्षेत्रको प्रमुख इकाइ हो।नियुक्ति पछि थापाले सेवा स्तर सुधार, सेवा संस्कृतिको विकास, होटल नेटवर्क विस्तार र दिगो तथा परिणाममुखी वृद्धिका लागि प्रतिबद्धतासहित काम गर्ने बताएका छन्।
आफ्नो प्रतिकृया दिनुहोस्