३ कात्तिक, गण्डकी :प्रधानमन्त्री शेरबहादुर देउवाले सीमित साधन स्रोतका बाबजुद खेलका माध्यमबाट नेपाली खेलाडीले पुर्याएको योगदान महत्वपूर्ण रहेको बताउनुभएको छ । नवौँ राष्ट्रिय खेलकुदको आज पोखरामा आयोजित समापन समारोहमा उहाँले नेपाली खेलाडीले राष्ट्रिय एवं अन्तर्राष्ट्रियरूपमा उत्कृष्ट प्रदर्शन गरी देशको गरिमालाई उँचो बनाएको बताउनु भयो ।
राज्यमा खेलको विशिष्ट महत्त्व रहेको उल्लेख गर्दै प्रधानमन्त्री देउवाले यसको विकासका लागि राज्यको लगानी सँगै निजी क्षेत्रको लगानी लाई पनि प्रोत्साहित गरिनु पर्नेमा जोड दिनु भयो । स्थानीय एवं प्रदेशस्तरमा खेलको विकासका लागि पूर्वाधार लगायत लाई प्राथमिकता दिनुपर्ने उहाँले बताउनु भयो । नवौँ राष्ट्रिय खेलकुदका सन्दर्भमा बनेका तथा स्तरोन्नति गरिएका पूर्वाधारको संरक्षण गर्नु पर्नेमा उहाँले जोड दिनुभयो ।
नवौँ राष्ट्रिय खेलकुदलाई सम्पन्न गर्न खट्ने युवा तथा खेलकुद मन्त्रालय, राष्ट्रिय खेलकुद परिषद्ल गायतलाई प्रधानमन्त्रीले धन्यवाद व्यक्त गर्नुभयो । यस राष्ट्रिय खेलकुदले खेल क्षेत्रका लागि विशष्ट योगदान गरेको बताउँदै उहाँले राष्ट्रिय खेलकुदलाई नियमित र व्यवस्थित गर्दै लैजानुपर्ने आवश्यकता औँल्याउनुभयो । नवौँ राष्ट्रिय खेलकुदका क्रममा ज्यान गुमाएका प्याराग्लाइडिङका खेलाडी निमिस थापाप्रति श्रद्धाञ्जलि व्यक्त गर्दै प्रधानमन्त्रीले शोक सन्तप्त परिवारजनमा समवेदना व्यक्त गर्नुभयो ।
कार्यक्रममा युवा तथा खेलकुदमन्त्री महेश्वरजङ्ग गहतराजले नवौँ राष्ट्रिय खेलकुद नेपाली खेल क्षेत्रका लागि महत्त्वपूर्ण बनेको बताउनुभयो । गण्डकी प्रदेशमा सम्पन्न यस प्रतियोगिताले खेल क्षेत्रमा नयाँनयाँ प्रतिभा समेत स्थापित गरेको उल्लेख गर्दै उहाँले गण्डकी प्रदेशको खेलको सम्भावनालाई थप उजागर गरेको बताउनुभयो । खेल क्षेत्रको विकास सरकारको प्राथमिकतामा रहेको बताउँदै उहाँले आगामी दिनमा यस क्षेत्रलाई अझै व्यवस्थित गर्दै लगिने विश्वास व्यक्त गर्नुभयो ।
राष्ट्रिय खेलकुद परिषद्का उपाध्यक्ष शिव कोइरालाले नवौँ राष्ट्रिय खेलकुदले गण्डकीलाई खेलको केन्द्रका रूपमा स्थापित गरेको बताउनुभयो । खेललाई सम्पन्न गराउन योगदान गर्ने सबैप्रति उहाँले धन्यवाद व्यक्त गर्नुभयो । राष्ट्रिय खेलकुद परिषद्का सदस्य सचिव टङ्कलाल घिसिङले नवौँ राष्ट्रिय खेलकुद अन्तर्गतका खेल भव्यताका साथ सम्पन्न भएको बताउनुभयो ।
राष्ट्रिय खेलकुद परिषद्को ११५औँ बोर्ड बैठकले आगामी १०औँ राष्ट्रिय खेलकुद प्रतियोगिता कर्णालीमा गर्ने निर्णय गरेको उहाँले जानकारी दिनुभयो । पोखरा महानगरपालिकाका प्रमुख धनराज आचार्यले गण्डकी प्रदेशको राजधानीमा सम्पन्न खेलले यहाँको खेलका सम्भावनालाई उजागर गरेको बताउनुभयो । खेलकुदको समग्र विकासमा राज्यको ध्यान पुग्नुपर्नेमा उहाँले जोड दिनुभयो । (रासस)
आफ्नो प्रतिकृया दिनुहोस्