२९ वैशाख, शुक्ल पूर्णिमा, काठमाडौं:आज २५६९औँ बुद्ध जयन्ती देशभर विविध कार्यक्रम गरी मनाइँदैछ। नेपाल सहित विश्व भरका बौद्ध धर्मावलम्बीले श्रद्धा, भक्ति र सम्मानका साथ भगवान् गौतम बुद्धको जन्म, ज्ञान प्राप्ति र महा-परिनिर्वाणको सम्झनामा यो दिन विशेष रुपमा मनाउने गर्छन्।
२५६८ वर्ष अघि आजकै दिन कपिलवस्तुको लुम्बिनीमा राजा शुद्धोधन र रानी मायादेवीका सुपुत्रका रूपमा सिद्धार्थ गौतम जन्मिएका थिए। इसा पूर्व ५२८ मा उनले बोधगया स्थित बोधिवृक्ष मुनी ध्यान मार्फत बुद्धत्व प्राप्त गरेका थिए। त्यस पछिका दिनमा उनी ‘गौतम बुद्ध’ का नामले विश्वभर चिनिन थाले।
बुद्धले दु:ख निवारणको उपायका रूपमा प्रस्तुत गरेका अष्टाङ्गिक मार्ग — सम्यक् दृष्टि, सम्यक् सङ्कल्प, सम्यक् वाणी, सम्यक् कर्म, सम्यक् आजीविका, सम्यक् प्रयास, सम्यक् स्मृति र सम्यक् समाधि — आज पनि मानव जीवनका लागि मार्गदर्शक मानिन्छन्।
शान्ति, अहिंसा, मैत्री र करुणाको सन्देश बोकेका गौतम बुद्धलाई विश्व शान्तिका अग्रदूत र एशियाका तारा भनेर सम्मान गरिन्छ। बुद्ध दर्शन आज पनि विश्वभर विभिन्न पथ तथा सम्प्रदायका रूपमा अभ्यास गरिन्छ।
बुद्ध जयन्तीको अवसरमा नेपाल सरकारले आज सार्वजनिक बिदा दिएको छ।
आफ्नो प्रतिकृया दिनुहोस्