सिराहा । सिराहा जिल्लाको गोलबजार नगरपालिका–१३ डंग्राहा गाउँका १५ वर्षीय अभिषेक सिंहको अपहरणपछि निर्मम हत्या गरिएको छ। चार दिन देखि बेपत्ता रहेका अभिषेकको शव सोमबार बिहान करिब ६ बजे घरदेखि १०० मिटर पूर्व, जनता आधारभूत विद्यालय नजिकै आँपको रुखमुनि क्षतविक्षत अवस्थामा फेला परेको हो। शव सडेर दुर्गन्ध आउन थाले पछि स्थानीयले प्रहरीलाई खबर गरेका थिए।
प्रारम्भिक अनुसन्धान अनुसार मृतकको खुट्टामा छाला सहित नीलडाम भेटिएको छ भने शवमा आगो लगाइएको वा एसिड खन्याइएको हुन सक्ने अनुमान गरिएको छ। जिल्ला प्रहरी कार्यालय सिरहाका प्रहरी उपरीक्षक अनन्त कुमार शर्माले यो घटना अपहरणपछि हत्या भएको स्पष्ट देखिएको बताएका छन्। उनले मधेश प्रदेश प्रहरी मुख्यालयबाट फरेन्सिक टोली र तालिम प्राप्त कुकुर सहितको समूह ल्याई सूक्ष्म अनुसन्धान भइरहेको जानकारी दिएका छन्।
अभिषेक असोज ५ गते राति खाना खाए पछि घर बाहिर निस्किएका थिए र त्यसपछि बेपत्ता भएका थिए। भोलि पल्ट बिहान उनकी आमाको इमो खातामा अपहरणकारीले पाँच करोड रुपैयाँ फिरौती माग्दै सन्देश पठाएका थिए। परिवारले तत्कालै प्रहरीलाई जानकारी दिए पनि जीवित उद्धार सम्भव नभएको आफन्तहरूले बताएका छन्।
सात वर्ष अघि उनका पिता सञ्जय सिंहको करेण्ट लागेर मृत्यु भए पछि अभिषेक परिवारको एक मात्र उत्तराधिकारी थिए। पढाइ छाडेका उनी परिवारकै सिटी रिक्सा र ट्रयाक्टर चलाउँदै जीविकोपार्जन गर्दै आएका थिए।
यो हृदय विदारक घटना पछि डंग्राहा गाउँ शोक र त्रासले ग्रस्त भएको छ। गाउँभर रुवाबासी छाएको छ भने स्थानीयले सुरक्षा संकट बढेको गुनासो गरिरहेका छन्। प्रहरीले घटनामा संलग्न अपराधीलाई चाँडै नियन्त्रणमा लिई कानुनी दायरामा ल्याउने प्रतिबद्धता जनाएको छ।
मृतकका हजुरबुवाले भने, “रातभर खोजतलास गरियो तर अभिषेक भेटिएन। भोलिपल्ट बिहान उनकी आमाको इमो आईडीमा हिन्दीमा सन्देश आयो – पाँच करोड रुपैयाँ लिएर आउनु, अभिषेक सुरक्षित छ, हाम्रो कब्जामा छ। त्यसपछि मात्र नाति अपहरणमा परेको थाहा भयो। तत्कालै प्रहरीलाई खबर गर्यौं तर जीवित उद्धार सम्भव भएन।”
आफ्नो प्रतिकृया दिनुहोस्