काठमाडौं, १ कात्तिक। ‘GEN-Z’ प्रदर्शनपछि ६२ वटा कारागार र विभिन्न महत्वपूर्ण संरचनाको सुरक्षामा खटिएको नेपाली सेना, अवस्था सामान्य बन्दै गएपछि ४१ स्थानबाट फिर्ता गरिएको छ। भदौ २३ र २४ का प्रदर्शन पछि उपत्यका भित्र ५ र बाहिर ५७ गरी जम्मा ६२ स्थानमा सेना परिचालन गरिएको थियो।
सेनाले जनाएको अनुसार, हाल पनि सुरक्षा चुनौतीका कारण २१ स्थानमा फौज तैनाथ छ। प्रदर्शनका क्रममा भएका आगजनी, तोडफोड र दङ्गा जस्ता कठिन अवस्थालाई ६ देखि ८ घण्टा भित्र नियन्त्रणमा लिन सेना सफल भएको सेनाका उपरथी तथा युद्धकार्य महानिर्देशक अनुपजङ्ग थापाले जानकारी दिए।
थापाले भने, “अत्यन्त चुनौतीपूर्ण अवस्थामा समेत शून्य मानवीय क्षतिको साथ उद्धार कार्य सम्पन्न गर्न सफल भयौं, जसले अत्यावश्यक सेवा र वस्तुको आपूर्ति पुन: सहज बनाउन सहयोग पुग्यो।”
सिंहदरबारको मुख्य भवनमा आगजनी हुँदा पनि सेनाको पहल र तत्परताका कारण भित्र रहेका रणनीतिक कागजात, राष्ट्रिय सुरक्षा परिषद्, रक्षा मन्त्रालय र अर्थ मन्त्रालयको ‘डेटा सेन्टर’ सुरक्षित राख्न सफल भएको उनले बताए।
सेनाले देशको समग्र सुरक्षा व्यवस्थालाई बलियो बनाउने क्रममा सञ्चालनमा ल्याएको ‘हटलाइन’ मार्फत चोरी, लुटपाट र आगजनी सम्बन्धी गुनासाहरूमा तत्काल प्रतिक्रिया दिई सुरक्षाको प्रत्याभूति प्रदान गरिएको जनाएको छ।
थापाका अनुसार, “त्रिभुवन अन्तर्राष्ट्रिय विमानस्थलमा आक्रमण गर्ने उद्देश्यले जम्मा भएका करिब दुई हजार प्रदर्शनकारीलाई नियन्त्रणमा लिए पछि भदौ २५ गते देखि विमानस्थल पूर्ण रूपमा सञ्चालनमा ल्याइयो। सो क्रममा फसेका विदेशी पर्यटकहरूको पनि सुरक्षाको व्यवस्था गरिएको थियो। साथै उपत्यका स्थित विभिन्न दूतावास र विदेशी नागरिकहरूको सुरक्षाको प्रबन्ध पनि मिलाइएको थियो।”
यसअघि सिंहदरबार भित्र प्रवेश गरेका प्रदर्शनकारीलाई रोक्न सेना सफल भए पनि त्यस पछि भीड बढ्दै जाँदा घातक हतियार प्रयोग गर्नु पर्ने अवस्था आउन सक्ने भएकाले मानवीय क्षति रोक्न विशेष सावधानी अपनाइएको सेनाले स्पष्ट पारेको छ।
आफ्नो प्रतिकृया दिनुहोस्