२४ कात्तिक जनकपुरधाम ।मधेश प्रदेशका निजामती कर्मचारीहरूले मुख्यमन्त्री तथा मन्त्रिपरिषद्को कार्यालयमा कार्यरत कर्मचारीमाथि भएको कुटपिट र गैरपेशागत व्यवहारको विरोधमा संयुक्त रूपमा आक्रोश व्यक्त गरेका छन्।
प्रदेश भवन परिसरमा आयोजित भेलापछि जारी विज्ञप्तिमा भनिएको छ, “मुख्यमन्त्री तथा मन्त्रिपरिषद्को कार्यालयमा कार्यरत कर्मचारीमाथि गरिएको कुटपिट र धम्कीपूर्ण व्यवहार अत्यन्तै निन्दनीय छ। यस्तो कार्यले सम्पूर्ण निजामती सेवाप्रति अपमान र त्रासको वातावरण सिर्जना गरेको छ।”
विज्ञप्तिमा प्रदेश सरकारका कर्मचारी उपर निरन्तर भइरहेको हस्तक्षेप, अमर्यादित व्यवहार र कुटपिटको घटनाले कर्मचारी प्रशासनको मनोबल कमजोर बनाएको उल्लेख गरिएको छ। घटनाको निष्पक्ष छानबिन गरी दोषीमाथि कानूनी कारबाही गर्न माग गरिएको छ।
सो सन्दर्भमा नेपाल निजामती कर्मचारी संगठन, मधेश प्रदेश समितिले प्रमुख जिल्ला अधिकारी मार्फत प्रदेश सरकार र संघीय सरकार दुवैको ध्यानाकर्षण गराएको छ। ज्ञापनपत्रमा भनिएको छ, “राज्यका कर्मचारीहरूमाथि ज्यान लिने गरि गरिएको आक्रमण तथा हातपात गर्नु कानूनी दृष्टिले गम्भीर अपराध हो। यस्ता घटनाले शासन प्रणाली र कर्मचारी मनोबल दुवैलाई हानी पुर्याउँछ।”
विज्ञप्तिमा ९५ जना भन्दा बढी कर्मचारीका हस्ताक्षर छन्। उनीहरूले भनेका छन् कि यदि दोषीमाथि छानबिन र कारबाही नभएमा उनीहरू बाध्य भएर कडा आन्दोलनका कार्यक्रम सार्वजनिक गर्नेछन्।
कर्मचारीहरूले सुशासन, सेवा प्रवाह र प्रशासनिक मर्यादा जोगाउन प्रदेश सरकारसँग कार्यस्थलमा सुरक्षित र सम्मानजनक वातावरण कायम गर्न माग गरेका छन्।
आफ्नो प्रतिकृया दिनुहोस्