१० असोज भदौ शुक्ल पूर्णिमा,काठमाडौं : संयुक्त राष्ट्रसंघको ८१औँ महासभामा सहभागी भएर प्रधानमन्त्री वालेन्द्र शाह आज स्वदेश फर्कनु भएको छ।प्रधानमन्त्री शाहलाई त्रिभुवन अन्तर्राष्ट्रिय विमानस्थलमा अर्थमन्त्री डा. स्वर्णिम वाग्ले, गृहमन्त्री सुधन गुरुङ तथा संस्कृति, पर्यटन तथा नागरिक उड्डयनमन्त्री खडकराज पौडेलले स्वागत गर्नु भएको थियो।
नेपाली प्रतिनिधि मण्डलको नेतृत्व गर्दै प्रधानमन्त्री शाह असोज ६ गते संयुक्त राज्य अमेरिकाको न्युयोर्क प्रस्थान गर्नु भएको थियो। उहाँ महासभाको उच्चस्तरीय सप्ताह अन्तर्गतका कार्यक्रममा सहभागी हुनु भएको हो।
प्रधानमन्त्री शाहसँगै परराष्ट्रमन्त्री शिशिर खनाल, प्रधानमन्त्रीका प्रमुख राजनीतिक सल्लाहकार कुमार ब्यञ्जनकार, परराष्ट्र सचिव अमृत बहादुर राई लगायत प्रतिनिधि मण्डलमा सहभागी थिए। प्रधानमन्त्री शाह भन्दा अघि नै न्युयोर्क पुग्नु भएका परराष्ट्रमन्त्री खनाल भने महासभा अन्तर्गतका विभिन्न कार्यक्रममा सहभागी भइरहनु भएको उहाँको सचिवालयले जनाएको छ।
प्रधानमन्त्री शाहले शुक्रबार संयुक्त राष्ट्रसंघको महासभालाई सम्बोधन गर्नु भएको थियो। सम्बोधनका क्रममा उहाँले जलवायु न्यायलाई अन्तर्राष्ट्रिय दस्तावेजमा उल्लेख गरिने विषयमा मात्र सीमित नराखी प्रभावित मुलुक र समुदायको जीवनमा प्रत्यक्ष अनुभूति हुने गरी कार्यान्वयन गर्नु पर्नेमा जोड दिनु भएको थियो।
उहाँले जलवायुजन्य विपद्का कारण प्रभावित नागरिकलाई पटक–पटक विगतको पुनर्निर्माणमा मात्र सीमित नराखी आफ्नो भविष्य निर्माण गर्ने अवसर दिनुपर्ने धारणा राख्नु भएको थियो।प्रधानमन्त्री शाहले गत भदौ १० गते भोटेकोशी नदीमा आएको बाढीबाट भएको जनधनको क्षति बारे महासभामा जानकारी गराउँदै उक्त घटना नेपालका लागि मात्र नभई विश्व समुदायका लागि समेत जलवायु परिवर्तनको गम्भीर चेतावनी भएको बताउनु भएको थियो।
जलवायु परिवर्तनले कुनै भौगोलिक सीमा नमान्ने उल्लेख गर्दै उहाँले हिमनदी र बाढीले ‘पासपोर्ट’मा ‘भिसा’ लगाएर यात्रा नगर्ने बताउनु भएको थियो। त्यसैगरी, नेपाल, भारत र चीनको नेतृत्वमा ‘हिमालय जलवायु उत्थानशीलता संयन्त्र’ स्थापना गर्न उहाँले प्रस्ताव गर्नु भएको थियो।
अमेरिका भ्रमणका क्रममा प्रधानमन्त्री शाहले संयुक्त राष्ट्रसंघका महासचिव एन्टोनियो गुटेरेस सँग पनि भेटवार्ता गर्नुभएको थियो। भेटमा महासचिव गुटेरेसले भोटेकोशी बाढीबाट भएको जनधनको क्षति प्रति दुःख व्यक्त गर्दै जलवायु परिवर्तनका मुद्दामा संयुक्त राष्ट्रसङ्घ नेपालसँग ऐक्यबद्ध रहेको बताउनु भएको थियो।
भेटका क्रममा प्रधानमन्त्री शाहले नेपाल प्रति देखाएको सद्भाव र सहयोगका लागि महासचिव गुटेरेसलाई धन्यवाद दिनु भएको थियो। उहाँले महासचिव गुटेरेसको सफल कार्यकालका लागि शुभकामना समेत व्यक्त गर्नुभएको थियो।(pmonepal)
आफ्नो प्रतिकृया दिनुहोस्