वीरगन्ज । खानेपानी मन्त्री प्रदीप यादव र वीरगन्ज महानगर प्रमुख राजेशमान सिंहलाई मोबाइलमा फोन गरेर धम्की दिने एक युवतीलाई पर्सा प्रहरीले नियन्त्रणमा लिएको छ।
प्रहरीका अनुसार वीरगन्ज महानगरपालिका–२४, रामगढ निवासी किरण साहलाई शनिबार पक्राउ गरिएको हो। उनले मन्त्री यादव र मेयर सिंहलाई फोन मार्फत गोली ठोकी हत्या गर्ने धम्की दिएको गुनासो दर्ता भए पछि प्रहरीले उनलाई नियन्त्रणमा लिएको हो।
जिल्ला प्रहरी कार्यालय पर्साका सूचना अधिकारी डिएसपी किशोर लम्सालका अनुसार, युवतीका पिता सहित परिवारका केही सदस्य हैजाको कारण गम्भीर बिरामी भई अस्पतालको सघन कक्षामा उपचाररत रहेका बेला उनले असन्तुष्टि स्वरूप मन्त्री र मेयरलाई फोन गरेकी थिइन्। सोही क्रममा उनले ज्यान मार्ने धम्की समेत दिएकी थिइन्।
खानेपानी मन्त्रीसँग युवतीको भएको फोन वार्ताको अडियो क्लिप शुक्रबार देखि सामाजिक सञ्जालमा सार्वजनिक भइसकेको छ, जसमा उनले अभद्र शब्द प्रयोग गर्दै धम्की दिएको सुनिन्छ। प्रहरीले यस प्रकरणमा आवश्यक अनुसन्धान अघि बढाएको जनाएको छ।
आफ्नो प्रतिकृया दिनुहोस्