(आशिष कुमार मण्डल),२७ पुष,धनुषा : जनकपुरधाममा बढ्दो सवारी चाप, ट्राफिक समस्या र वायु प्रदूषणलाई मध्यनजर गर्दै ई–रिक्शाको विकल्पका रूपमा नगर बस सञ्चालन गर्ने तयारी थालिएको छ। नगर बस सञ्चालनले आम सर्वसाधारण देखि पर्यटक सम्म लाई सहज, सुरक्षित र किफायती यातायात सेवा उपलब्ध गराउने अपेक्षा गरिएको छ।
नगर बस सञ्चालन भएमा हाल अनियन्त्रित रूपमा चलिरहेका ई–रिक्शाको चाप घट्नेछ, जसले सडक व्यवस्थापनलाई थप सहज बनाउनेछ। विशेष गरी ब्याट्री बाट चल्ने (इलेक्ट्रिक) नगर बस प्रयोग गरिएमा इन्धनको खपत घट्नुका साथै ध्वनि तथा वायु प्रदूषणमा उल्लेखनीय कमी आउने सरोकारवालाहरूको भनाइ छ।
जनकपुरधाम धार्मिक तथा पर्यटकीय नगरी भएकाले यहाँ आउने स्वदेशी तथा विदेशी पर्यटकका लागि व्यवस्थित यातायात सेवा अत्यन्त आवश्यक छ। नगर बस मार्फत जानकी मन्दिर, राम मन्दिर, मिथिला कला केन्द्र, स्टेशन तथा प्रमुख चोकहरू जोडिएमा पर्यटकलाई सहज घुमफिरको सुविधा मिल्नेछ, जसले पर्यटन प्रवर्द्धनमा पनि टेवा पुर्याउने छ।
हाल जनकपुरधाममा बढ्दो सवारी साधनका कारण उत्पन्न प्रदूषणले जानकी मन्दिर क्षेत्र समेत प्रभावित हुँदै गएको स्थानीयवासीहरूको गुनासो छ। यस्तो अवस्थामा वातावरणमैत्री नगर बस सञ्चालन नगरको सौन्दर्य, धार्मिक महत्त्व र जनस्वास्थ्य संरक्षणका लागि समयसापेक्ष कदम हुने देखिन्छ।
भाडादर पनि सर्वसाधारणको पहुँचमा हुने गरी निर्धारण गरिएमा विद्यार्थी, मजदुर, वृद्ध-वृद्धा र दैनिक यात्रुहरूलाई प्रत्यक्ष लाभ पुग्नेछ। नगर बस सञ्चालन सँगै ट्राफिक अनुशासन, निर्धारित रुट र समयतालिका लागू गरिए जनकपुरधामको शहरी यातायात प्रणाली थप व्यवस्थित हुने अपेक्षा गरिएको छ।
सरोकारवालाहरूले नगरपालिकाले दीर्घकालीन योजना बनाएर इलेक्ट्रिक नगर बस सेवा शीघ्र कार्यान्वयन गर्नु पर्ने माग गरेका छन्। यसले जनकपुरधामलाई स्वच्छ, सुन्दर र पर्यावरणमैत्री सहरका रूपमा विकास गर्न महत्वपूर्ण भूमिका खेल्ने विश्वास लिइएको छ।
आफ्नो प्रतिकृया दिनुहोस्