१५ चैत,जनकपुर । मधेश प्रदेशका गृह, सञ्चार तथा कानुनमन्त्री फकिरा महतो पछिल्ला दिनमा जनकपुरधाममा सञ्चालन गरिएको अतिक्रमण हटाउने अभियानका कारण ‘बुलडोजर मन्त्री’ का रूपमा चर्चामा आएका छन्। स्थानीयले उनलाई भारतका योगी आदित्यनाथ सँग तुलना गर्न थालेका छन्।
केही दिनयता मन्त्री महतो स्वयं सडक, चोक र मन्दिर आसपासका फुटपाथ खाली गराउन सक्रिय रूपमा खटिँदै आएका छन्। यसैक्रममा आज जनकपुरधाम स्थित गंगासागर पोखरी नजिकको हेरिटेज वाक क्षेत्रमा रहेका अवैध टहरा तथा फुटपाथमा सञ्चालन भइरहेका पसलहरूमा डोजर चलाएर हटाइएको छ।
मन्त्री महतोको नेतृत्वमा पुगेको टोलीले अनाधिकृत संरचना हटाएको हो। करिब १० दिन अघि नै व्यवसायीहरूलाई स्थान खाली गर्न सूचना दिइएको भए पनि अटेर गरेपछि बाध्य भएर डोजर प्रयोग गरिएको मन्त्री महतोले बताए।
उनका अनुसार जनकपुरधामलाई स्वच्छ, सफा र व्यवस्थित पर्यटकीय सहरका रूपमा विकास गर्ने लक्ष्य सहित प्रदेश सरकारले जनकपुरधाम उपमहानगरपालिका र उद्योग वाणिज्य संघ जनकपुरधाम सँग समन्वय गर्दै फुटपाथ व्यवस्थापन अभियान अघि बढाएको हो।
यता, फुटपाथमा व्यवसाय गर्दै आएका व्यापारीहरूले वैकल्पिक व्यवस्था नगरी डोजर चलाउनु अन्याय भएको गुनासो गरेका छन्। उनीहरूले आफूहरूलाई अन्यत्र स्थान उपलब्ध गराइ पुन:स्थापना गर्न माग गरेका छन्।
यस अभियान प्रति जनकपुरवासीको मिश्रित प्रतिक्रिया देखिएको छ। धेरैले सहरको सौन्दर्य र व्यवस्थापनका लागि आवश्यक कदम भन्दै समर्थन जनाएका छन् भने केहीले गरीब व्यवसायीमाथि असर परेको भन्दै चिन्ता व्यक्त गरेका छन्।
आफ्नो प्रतिकृया दिनुहोस्