२१ माघ,जनकपुरधाम । राष्ट्रिय खोप कार्यक्रम अन्तर्गत पाठेघरको मुखको क्यान्सर (सर्भाइकल क्यान्सर) विरुद्धको एचपीभी खोप अभियान सञ्चालनका लागि आज मिति २०८२।१०।२१ गते जनकपुरधाम उपमहानगरपालिकामा एक विशेष कार्यक्रम सम्पन्न भएको छ। नगर प्रमुख मनोज कुमार साहको अध्यक्षतामा आयोजित उक्त कार्यक्रममा खोप अभियानको उद्देश्य, कार्ययोजना तथा लक्षित समूह बारे विस्तृत छलफल गरिएको थियो।
कार्यक्रममा उपमहानगरपालिकाका प्रशासन शाखा प्रमुख जय कुमार साह, स्वास्थ्य शाखा प्रमुख विजय साह सहित विभिन्न शाखा प्रमुखहरू, नगरभित्रका वडास्तरीय स्वास्थ्यकर्मीहरू तथा सम्बन्धित सरोकारवालाहरूको उल्लेखनीय उपस्थिति रहेको थियो। सहभागीहरूले एचपीभी खोपले बालिकाहरूको भविष्य सुरक्षित गर्न महत्त्वपूर्ण भूमिका खेल्ने भन्दै अभियानलाई सफल बनाउन सबैको सहकार्य आवश्यक रहेको धारणा व्यक्त गरे।
स्वास्थ्य शाखाका अनुसार यो खोप अभियान यही माघ २५ गते देखि फाल्गुन १० गते सम्म सञ्चालन गरिनेछ। अभियान अन्तर्गत जनकपुरधाम उपमहानगरपालिकाका २५ वटै वडामा रहेका विद्यालयहरू तथा प्रत्येक वडाका वडाखोप केन्द्र मार्फत खोप प्रदान गरिनेछ। कक्षा ६ मा अध्ययनरत बालिकाहरू, विद्यालय बाहिर रहेका १० वर्ष उमेरका बालिकाहरू, साथै गत वर्षको अभियानमा छुट भएका ११ देखि १४ वर्ष उमेर समूहका बालिकाहरूलाई यो खोप पूर्ण रूपमा नि:शुल्क लगाइने जनाइएको छ।
नगर प्रमुख साहले कार्यक्रममा बोल्दै सर्भाइकल क्यान्सर महिलामा देखिने गम्भीर स्वास्थ्य समस्या मध्ये एक भएकाले यसको रोकथामका लागि एचपीभी खोप अत्यन्त प्रभावकारी रहेको बताए। उनले अभिभावक, विद्यालय प्रशासन तथा समुदायका सबै पक्षलाई अभियानमा सक्रिय सहभागिता जनाउन आग्रह गर्दै लक्षित समूहका कुनै पनि बालिका खोप बाट वञ्चित नहोउन् भन्नेमा उपमहानगरपालिका प्रतिबद्ध रहेको स्पष्ट पारे।
स्वास्थ्यकर्मीहरूले खोप सुरक्षित र प्रभावकारी रहेको जानकारी दिँदै निर्धारित समयमै खोप लगाउन अभिभावकहरू लाई सचेत गराएका छन्। उपमहानगरपालिकाले यो अभियानले दीर्घकालीन रूपमा महिला स्वास्थ्य संरक्षणमा सकारात्मक प्रभाव पार्ने विश्वास लिएको छ।
आफ्नो प्रतिकृया दिनुहोस्