२८ पुष,जनकपुर : जनकपुरधाममा बढ्दो फूटपाथ अतिक्रमणका कारण सर्वसाधारण पैदलयात्रीहरू गम्भीर समस्यामा परिरहेका बेला यस विषयमा पत्रकार ध्रुब झाले सक्रिय पहल शुरु गरेका छन्। फूटपाथ खाली गराई व्यवस्थित सहर निर्माण गर्ने उद्देश्य सहित उनले अभियानको शुरुवात गरेका हुन्।
विगत लामो समय देखि जनकपुरधामका मुख्य सडक र बजार क्षेत्रका फूटपाथहरू अव्यवस्थित व्यापार, अतिक्रमण र बेवास्ताका कारण पैदल हिँड्नै नसक्ने अवस्थामा पुगेका छन्। यस प्रति सरकार, सरोकारवाला निकाय र जिम्मेवार पक्षहरू मौन बसेको आरोप स्थानीयवासीहरूले लगाउँदै आएका छन्।
पत्रकार ध्रुब झाले फूटपाथ व्यवस्थापनको विषयलाई सार्वजनिक बहसमा ल्याउँदै “यदि सरकार र सरोकारवाला निकाय इमानदार र जिम्मेवार भएको भए आज जनकपुरधामले यस्तो दुर्दशा भोग्नुपर्ने थिएन” भन्ने प्रश्न उठाएका छन्। उनको यो अभियानलाई धेरैले सकारात्मक र सराहनीय पहलका रूपमा लिएका छन्।
तर सरोकारवालाहरूका अनुसार एक जना व्यक्तिको प्रयासले मात्र शहरमा परिवर्तन सम्भव छैन। जनकपुरधामसँग सरोकार राख्ने सबै पक्ष—नगरपालिका, प्रशासन, व्यापारी, राजनीतिक दल, नागरिक समाज र सर्वसाधारण—सबैको सहकार्य, सहभागिता र समर्थन आवश्यक छ। दुर्भाग्यवश, परिवर्तन चाहने धेरै भए पनि परिवर्तनका लागि संघर्षरत व्यक्तिलाई सहयोग, हौसला र सहकार्य गर्ने प्रवृत्ति अत्यन्त न्यून देखिन्छ।
स्थानीय समाजमा नेता, पार्टी, पत्रकार वा समाजसेवीको नाममा गलत प्रवृत्तिका मानिसहरू सक्रिय भएकै कारण केही इमानदार र राम्रो काम गर्नेहरू पनि शंकाको दृष्टिले हेरिने अवस्था बनेको टिप्पणी समेत गरिएको छ। यस्ता ठग प्रवृत्तिका कारण समाजमा सही र गलत छुट्याउने क्षमतामै असर परेको जानकारहरू बताउँछन्।
सरोकारवालाहरूले वास्तविकता बुझी सकारात्मक पहललाई खुलेर सराहना र समर्थन गर्न तथा गलत प्रवृत्तिको आलोचना र बहिष्कार गर्न सक्ने साहस समाजमा विकास हुनुपर्नेमा जोड दिएका छन्। उनीहरूका अनुसार चापलुसी र चाटुकारिताले क्षणिक लाभ त दिन सक्छ, तर दीर्घकालीन रूपमा यसले समाजलाई गम्भीर क्षति पुर्याउने गर्दछ।
जनकपुरधामको फूटपाथ व्यवस्थापन केवल पत्रकार ध्रुब झाको अभियानमा सीमित नरही सामूहिक जिम्मेवारीको विषय बन्नु पर्ने आवाज अहिले थप सशक्त बन्दै गएको छ।
आफ्नो प्रतिकृया दिनुहोस्