३०आश्विन,काठमाडौँ : उपराष्ट्रपति नन्दबहादुर पुनले अन्तर्राष्ट्रिय पर्वतीय संग्राहलयको आज अध्ययन अवलोकन गर्नुभएको छ । हिमाल र हिमालीको गतिविधिबारेमा संग्रह गरी प्रदर्शन गरिएको संग्राहलयको उहाँले रुचिपूर्वक अवलोकन गर्नुभएको हो । नेपाल पर्वतारोहण संघद्वारा पोखरा महानगरपालिका–१७ रातोपैह्रामा निर्माण गरी सञ्चालनमा आएको संग्राहलय भवनभित्र विभिन्न चार कक्षा अन्तर्गत १२ उपकक्षमा संग्रहित सामग्री प्रदर्शनमा राखिएको छ ।
संग्राहलयको पर्वतीय मानव कक्ष, हिमालीको सामाजिक, सांस्कृतिक, धार्मिक एवं आर्थिक क्रियाकलाप झल्काउने सामग्री, विश्वका पर्वत शृंखला को उत्पति, भौगर्भिक महत्व, वन्यजन्तु, वनस्पति तथा खनिज पदार्थको प्रदर्शन गरिएको संग्राहलयका निर्देशक निर्मलाकुमारी न्यौपानेले उपराष्ट्रपति समक्ष जानकारी गराउनुभयो ।उहाँका अनुसार उक्त कक्षमा विश्वका पर्वत शृंखलामा हुने पर्वतारोहण, पदयात्रा, स्कीइङ, शिकार, अनुसन्धान जस्ता मानवीय गतिविधिका महत्वपूर्ण एवं ऐतिहासिक पक्षको प्रदर्शनी गरिएको छ ।
विश्वका हिमाल र हिमाली क्षेत्रका बारेमा अनुसन्धान गर्ने अध्येता, अन्वेषकका लागि उपयुक्त थलोका रुपमा लिइएको संग्राहलय परिसरमा निर्माण बोटानिकल गार्डेन, मनास्लु हिमालको मोडल, ढलोटको याकलगायतका विविध संरचना निर्माण गरिएको छ ।सो अवसरमा उपराष्ट्रपति पुनले संग्राहलयमा राखिएको आगन्तुक पुस्तिकामा हस्ताक्षर गर्दै पर्यटन प्रवर्धनमा संग्राहलयको महत्वपूर्ण भूमिका निर्वाह गर्दै आएको बताउनुभयो । (रासस)
आफ्नो प्रतिकृया दिनुहोस्