जनकपुर । पछिल्ला महिनाहरूमा धनुषाको विभिन्न क्षेत्रमा अवैध देह व्यापारको गतिविधि बढ्दै गएको पाइएको छ । विशेष गरी ढल्केवर र वरपरका क्षेत्रमा लज तथा डान्स बार मार्फत यस्ता क्रियाकलाप सञ्चालन हुँदै आएको स्थानीयवासीले जानकारी गराएका छन् ।
स्थानीयको उजुरी पछि प्रहरीले ती अवैध लज तथा डान्स बारहरूमा छापा मार्ने कार्यलाई तीव्र पारेको छ । सोही क्रममा धनुषाको गणेशमान चारनाथ नगरपालिका–७ मा प्रहरीले दुई वटा होटलमा छापा मारेर सात जना लाई नियन्त्रणमा लिएको हो ।
जिल्ला प्रहरी कार्यालय धनुषा र इलाका प्रहरी कार्यालय ढल्केवरको संयुक्त टोलीले मानव होटल र गोदावरी होटलमा छापा मार्दा मानव होटलबाट तीन महिला, तीन पुरुष र सञ्चालक राजेन्द्र महतो पक्राउ परेका छन् । यस्तै, गोदावरी होटलबाट एक महिला र एक पुरुष पक्राउ परेका छन् भने उक्त होटलका सञ्चालक विजय राउत भने फरार रहेको प्रहरीले जनाएको छ ।
पक्राउ परेकाहरू लाई आवश्यक अनुसन्धान तथा कारबाहीका लागि इलाका प्रहरी कार्यालय ढल्केवरमा राखिएको छ । यसै बीच, फरार रहेका सञ्चालक राउतको खोजी जारी रहेको प्रहरीको भनाइ छ ।
यस अघि पनि ढल्केवर र महोत्तरीको बर्दिवास क्षेत्रमा रहेका विभिन्न स्पा, मसाज सेन्टर तथा डान्स बारमा प्रहरीले कारबाही गरेको थियो । ढल्केवरका डान्स बारहरूमा भारतीय पर्यटक र युवाको भीड बढे सँगै झगडा र अव्यवस्था हुने गरेको भन्दै स्थानीयले बारम्बार गुनासो गर्दै आएका थिए ।
आफ्नो प्रतिकृया दिनुहोस्