११ भदौ,रौतहट । रौतहटमा बन्द सुटकेस भित्र मृत भेटिएकी रुबी साहको हत्याको मुख्य आरोपी लक्ष्मण पासवानलाई प्रहरीले पक्राउ गरेको छ। उनलाई माधव नारायण नगरपालिका–६, माधोपुर नजिकै आफैँले शरीरमा डिजेल खन्याएर आगो लगाएको अवस्थामा स्थानीयले भेटेका थिए।
जिल्ला प्रहरी कार्यालय रौतहटका प्रवक्ता डीएसपी राजु कार्कीका अनुसार पासवानको टाउको सहित शरीरका धेरै भाग जलेको र बोल्न पनि कठिन भएको छ। उनलाई तत्कालै उपचारका लागि प्रादेशिक अस्पताल गौरमा भर्ना गरियो, जहाँबाट थप उपचारका लागि काठमाडौं लगिएको छ।
आत्महत्याको प्रयास गर्नु अघि पासवानले बनाएको एक भिडिओमा रुबीको हत्या गरेको स्वीकार गरेका छन्। झन्डै ९ मिनेटको उक्त भिडिओमा उनले रुबी सँग विद्यालय समय देखिको प्रेम सम्बन्ध रहेको र अदालतमा गएर विवाह समेत गरेको बताएका छन्। गरिबी र पारिवारिक तनावका कारण रुबीको हत्या गरेको उनले स्वीकार गरेका छन्।
प्रहरीको अनुसन्धान बाट पासवान नै रुबीको हत्यामा मुख्य संलग्न रहेको खुलेको थियो। पासवानले आफ्नो हातमा ‘My Heart Rubi Kumari’ र छातीमा रुबीको फोटोको ट्याटु बनाएको पाइएको छ।
यस अघि, रुबीको शव ई-रिक्सामा राखेर उक्त स्थान सम्म पुर्याएको आरोपमा प्रहरीले रिक्सा चालक लक्ष्मण महरालाई पनि पक्राउ गरिसकेको छ। प्रहरीले यस घटनाबारे थप अनुसन्धान गरिरहेको जनाएको छ।
आफ्नो प्रतिकृया दिनुहोस्