काठमाडौं ।नेपाल क्रिकेट लिग (एनपीएल) का गत संस्करणका विजेता जनकपुर बोल्ट्सले वेस्ट इन्डिजका पूर्व स्टार क्रिकेटर शिवनारायण चन्द्रपाललाई नयाँ मुख्य प्रशिक्षकको रूपमा नियुक्त गरेको छ ।बोल्ट्स व्यवस्थापनका अनुसार चन्द्रपालको नेतृत्वमा टोलीले आफ्नो प्रदर्शन र सफलता निरन्तरता दिने विश्वास लिइएको छ ।
१६४ टेस्ट र २६८ एक दिवसीय अन्तर्राष्ट्रिय खेल खेलेका चन्द्रपालले करिब २१ वर्षको अन्तर्राष्ट्रिय क्रिकेट यात्रामा २० हजार भन्दा बढी रन बनाएका छन् । धैर्यशील र स्थायित्वपूर्ण ब्याटिङका लागि प्रसिद्ध चन्द्रपाल विश्व क्रिकेटका अत्यन्त सम्मानित ब्याट्सम्यान मध्ये एक मानिन्छन् ।
उनले क्यारेबियन प्रिमियर लिग (CPL), भाइटालिटी ब्लास्ट, बंगलादेश प्रिमियर लिग (BPL), च्याम्पियन्स लिग टी–२०, र इन्डियन प्रिमियर लिग (IPL) लगायतका प्रतियोगितामा खेलिसकेका छन् । साथै, उनले काउन्टी क्रिकेटमा पनि लामो अनुभव हासिल गरेका छन् ।
सन् २०२२ मा ५१ वर्षको उमेरमा उनले सिपिएल फ्रेन्चाइज जमैका तलवाहज का प्रशिक्षकका रूपमा आफ्नो नयाँ अध्याय सुरु गरेका थिए । त्यसै वर्ष उनी अमेरिकी महिला राष्ट्रिय क्रिकेट टोलीका मुख्य प्रशिक्षक बनेका थिए ।जनकपुर बोल्ट्सका अनुसार, “चन्द्रपाल जस्ता दिग्गज क्रिकेटरको आगमनले टोलीमा नयाँ ऊर्जा, दृष्टि र रणनीति थपिनेछ । उनको अनुभवले बोल्ट्सलाई पुन: विजयी यात्रा तर्फ अघि बढाउने विश्वास गरिएको छ।”
यस्तै, क्लबले गत संस्करणमा टोलीलाई च्याम्पियन बनाएका प्रशिक्षक पुबुदु दासानायके प्रति आभार व्यक्त गरेको छ । दासानायके हाल अमेरिकी राष्ट्रिय क्रिकेट टोलीका मुख्य प्रशिक्षकका रूपमा कार्यरत छन् ।
आफ्नो प्रतिकृया दिनुहोस्