१६ माघ,मधेश प्रदेश : देश र जनताको स्वतन्त्रता, लोकतन्त्र तथा नागरिक अधिकारका लागि जीवन आहुति दिने महान् शहिदहरूको स्मरणमा आज शुक्रबार देशभर शहिद दिवस श्रद्धा र सम्मानका साथ मनाइँदैछ। संघीय सरकारका साथै प्रदेश र स्थानीय तहमा विविध श्रद्धाञ्जली, दीप प्रज्वलन, प्रभातफेरी तथा सचेतनामूलक कार्यक्रमहरू आयोजना गरिएका छन्।
मधेश प्रदेश सरकारका तर्फबाट पनि शहिद दिवसको अवसरमा विशेष कार्यक्रमहरू आयोजना गरिएको छ। मुख्यमन्त्री तथा मन्त्रिपरिषद् कार्यालयको समन्वयमा स्वास्थ्य तथा जनसंख्या मन्त्रालय, खेलकुद तथा समाज कल्याण मन्त्रालय र शिक्षा मन्त्रालयले शहिद प्रति श्रद्धाञ्जली अर्पण गर्दै विभिन्न स्मरण तथा चेतनामूलक कार्यक्रम सञ्चालन गरेका छन्।
प्रजातन्त्र, स्वतन्त्रता र न्यायको स्थापनाका लागि आफ्नो अमूल्य जीवन बलिदान गर्ने शहिदप्रति सम्मान व्यक्त गर्दै हरेक वर्ष माघ १६ गते शहिद दिवस मनाइँदै आएको छ। नेपालमा प्रजातन्त्र स्थापनाका लागि बलिदान दिएका चार महान् शहिद—धर्मभक्त माथेमा, दशरथ चन्द, गङ्गालाल श्रेष्ठ र शुक्रराज शास्त्री सहित विभिन्न राजनीतिक आन्दोलन, परिवर्तन र अधिकारका संघर्षमा ज्यान गुमाएका शहिदहरूको योगदान आज विशेष रूपमा स्मरण गरिँदैछ।
राणा शासन विरुद्ध सचेत आवाज उठाएको आरोपमा तत्कालीन शासकले ती शहिदहरूलाई मृत्युदण्ड दिएको थियो। उनीहरूको साहसी बलिदानले नेपाली समाजमा राजनीतिक चेतनाको बीजारोपण गर्दै जहानियाँ राणा शासनको अन्त्य र प्रजातान्त्रिक व्यवस्थाको स्थापनामा ऐतिहासिक भूमिका खेलेको मानिन्छ।
शहिद दिवस केवल विगतको स्मरण गर्ने दिन मात्र नभई प्रजातन्त्र स्थापना, पुन:स्थापना तथा देशको सार्वभौमिकता, स्वतन्त्रता र सामाजिक न्यायका लागि संघर्ष गरेका शहिदहरूको आदर्शबाट प्रेरणा लिने अवसर समेत हो। यही उद्देश्यका साथ माघ १० देखि १६ गते सम्म ‘शहिद सप्ताह’ मनाइँदै आएको छ, जस अन्तर्गत विभिन्न सरकारी निकाय तथा संघसंस्था मार्फत कार्यक्रमहरू सञ्चालन हुँदै आएका छन्।
स्वतन्त्रताको माग गर्दै निरङ्कुश शासन विरुद्ध संघर्ष गर्ने क्रममा १९९७ सालमा शहिद शुक्रराज शास्त्रीलाई माघ १० गते काठमाडौंको टेकु स्थित पचलीमा, धर्मभक्त माथेमालाई माघ १३ गते सिफलमा तथा गङ्गालाल श्रेष्ठ र दशरथ चन्दलाई माघ १५ गते शोभा भगवतीमा तत्कालीन राणा शासकले मृत्युदण्ड दिएको थियो।
आजको दिन शहिदहरूको सपना र त्यागलाई आत्मसात् गर्दै लोकतन्त्रको संरक्षण, सुशासनको प्रवर्द्धन, सामाजिक समावेशिता र नागरिक अधिकारको सुनिश्चितताप्रति राज्य र नागरिक सबैले साझा प्रतिबद्धता व्यक्त गर्ने दिनका रूपमा मनाइँदैछ।
आफ्नो प्रतिकृया दिनुहोस्