३ चैत,जनकपुर । मधेश प्रदेशका मुख्यमन्त्री कृष्ण प्रसाद यादवले आफ्नो नेतृत्वमा रहेको सरकारको पहिलो १०० दिनको कार्यसम्पादन सार्वजनिक गर्दै ५१ वटा महत्वपूर्ण काम अगाडि बढाइएको बताएका छन्।मंगलबार जनकपुरधाम स्थित मुख्यमन्त्री तथा मन्त्रिपरिषद्को कार्यालयमा आयोजित पत्रकार सम्मेलनमा उनले विभिन्न क्षेत्रमा सुरु भएका र कार्यान्वयनको चरणमा रहेका योजना बारे विस्तृत जानकारी दिए।
मुख्यमन्त्री यादवका अनुसार स्वास्थ्य, शिक्षा, कृषि, पर्यटन, सिँचाइ, भौतिक पूर्वाधार, खेलकुद, वन, यातायात तथा अर्थ क्षेत्रसँग सम्बन्धित गरी ५१ वटा प्रमुख कामहरू अघि बढाइएको हो।उनले जनकपुरधाम स्थित प्रादेशिक अस्पतालमा बिरामीहरूले घरमै बसेर मोबाइल मार्फत टिकट (पुर्जा) काट्न सक्ने व्यवस्था सुरु गरिएकोलाई महत्वपूर्ण उपलब्धिको रूपमा उल्लेख गरे।
कृषि क्षेत्रमा किसानलाई राहत दिन मल अनुदान पुन: पुरानै अवस्थामा ल्याउन संघीय सरकार समक्ष प्रस्ताव पेश गरिएको उनले जानकारी दिए। त्यसैगरी, जनकपुरधामको जानकी मन्दिरलाई विश्व सम्पदा सूचीमा सूचीकृत गराउन आवश्यक मापदण्ड तयार गरी सम्बन्धित निकायसँग समन्वय भइरहेको बताए।
खेलकुद पूर्वाधार अन्तर्गत राम जानकी रंगशाला निर्माण प्रक्रिया अघि बढाइएको तथा इ–रिक्सा र ट्र्याक्टर चालकहरूका लागि प्रयोगात्मक परीक्षामार्फत लाइसेन्स दिने व्यवस्था सुरु गरिएको पनि उनले जानकारी दिए।
‘एक निर्वाचन क्षेत्र, पाँच किलोमिटर सडक’ योजना अन्तर्गत पहिलो चरणका कामहरू सम्पन्न भइसकेको र दोस्रो चरणको तयारी पूरा भएको मुख्यमन्त्री यादवले बताए।यस्तै, गर्मीयाममा देखिने खानेपानी अभावको समस्या समाधानका लागि विज्ञहरूसँग छलफल गरी दीर्घकालीन उपाय खोज्ने काम समेत भइरहेको उनले उल्लेख गरे।
आफ्नो प्रतिकृया दिनुहोस्