२० चैत,जनकपुर । मधेश प्रदेशका गृह, सञ्चार तथा कानुन मन्त्री फकिरा महतोले जनकपुरधाम स्थित प्रादेशिक अस्पतालमा आकस्मिक (छड्के) अनुगमन गरेका छन्।
शुक्रबार बिहान गरिएको अनुगमनका क्रममा मन्त्री महतोले अस्पतालको आकस्मिक कक्ष, प्रसूति गृह, डायलाइसिस विभाग, आईसीयू तथा ओपीडी सेवा अवलोकन गरेका थिए। यस क्रममा उनले उपचाररत बिरामीहरूसँग प्रत्यक्ष संवाद गर्दै सेवा सुविधा बारे जानकारी लिए भने अस्पतालका निर्देशक डा. जामुन प्रसाद सिंह सँग समग्र अवस्था बारे छलफल गरेका थिए।
अनुगमनका क्रममा निर्देशक डा. सिंहले अस्पतालमा कर्मचारी अभाव, सरसफाइमा देखिएको कमजोरी तथा आवश्यक पूर्वाधारको कमी बारे मन्त्रीको ध्यानाकर्षण गराएका थिए। साथै उनले राजनीतिक पहुँचका कारण स्वास्थ्य क्षेत्रमा हुनु पर्ने लगानी अन्यत्र खर्च हुने गरेको गुनासो पनि व्यक्त गरेका थिए।
अनुगमन पछि सञ्चारकर्मीहरूसँग कुरा गर्दै मन्त्री महतोले अस्पताल आफ्नो मन्त्रालय अन्तर्गत नपरे पनि आगामी बजेटमा सरसफाइ सुधार तथा आवश्यक सामग्री व्यवस्थापनका लागि बजेट विनियोजन गर्न पहल गर्ने बताए। उनले तत्कालका समस्याहरू विशेष गरी कर्मचारी दरबन्दीसम्बन्धी विषय सम्बन्धित निकायसँग समन्वय गरी छिट्टै समाधान गर्ने प्रतिबद्धता समेत जनाए।
मन्त्री महतोले जनकपुरधाममा सरसफाइ तथा फुटपाथ व्यवस्थापनको काम लगभग सम्पन्न भइसकेको उल्लेख गर्दै अब स्वास्थ्य र त्यसपछि शिक्षा क्षेत्रमा सुधारलाई प्राथमिकता दिने बताए।उनले हाल धनुषा जिल्लामा केन्द्रित भएर काम गरिरहेको जनाउँदै यहाँका समस्या समाधान भए पछि प्रदेशका अन्य जिल्लामा पनि पुगेर आवश्यक सुधारका पहल गर्ने योजना रहेको जानकारी दिए।
उल्लेखनीय छ, मन्त्री महतो विगत एक साता देखि जनकपुरधामका फुटपाथ अतिक्रमण हटाउन स्वयं डोजर सहित बजार क्षेत्रमा सक्रिय देखिएका थिए। अहिले शहरका अधिकांश फुटपाथ खाली भइसकेका छन्।
आफ्नो प्रतिकृया दिनुहोस्