१३ चैत,काठमाडौं । नवनियुक्त गृहमन्त्री सुदन गुरुङले पद तथा गोपनीयताको शपथ ग्रहणपछि शुक्रबार गृह मन्त्रालय पुगेर औपचारिक रूपमा पदबहाली गरेका छन् ।
पदबहाली सँगै गुरुङले देशको आन्तरिक सुरक्षा व्यवस्थालाई सुदृढ बनाउने, शान्ति–सुरक्षा कायम गर्ने तथा नागरिकको सुरक्षालाई पहिलो प्राथमिकतामा राखेर काम गर्ने प्रतिबद्धता व्यक्त गरेका छन् । उनले प्रहरी प्रशासनलाई अझ जिम्मेवार र प्रभावकारी बनाउँदै सुशासन र विधिको शासनलाई बलियो बनाउने संकेत गरेका छन् ।
गुरुङ पछिल्लो समय ‘जेनजी आन्दोलन’पछि एकाएक राष्ट्रिय चर्चामा आएका व्यक्ति हुन् । गत भदौ २३ र २४ गते देशका विभिन्न स्थानमा भएको उक्त आन्दोलनमा उनको सक्रिय भूमिका रहेको बताइन्छ, जसले उनलाई युवामाझ लोकप्रिय बनाएको थियो ।
राजनीतिक विश्लेषकहरूका अनुसार सामाजिक आन्दोलनबाट उदाएका गुरुङको सरकारमा प्रवेशलाई नयाँ पुस्ताको प्रतिनिधित्वका रूपमा हेरिएको छ । उनले गोरखा क्षेत्र नम्बर १ बाट राष्ट्रिय स्वतन्त्र पार्टीको तर्फ बाट प्रतिनिधि सभा सदस्यमा विजय हासिल गरेका थिए ।
गृहमन्त्रीको जिम्मेवारी सम्हालेसँगै सीमापार अपराध नियन्त्रण, डिजिटल अपराधको बढ्दो चुनौती, तथा शान्ति सुरक्षामा देखिएका कमजोरीहरू समाधान गर्ने विषयमा उनको कार्यक्षमता परीक्षण हुने देखिएको छ । साथै, हालैका विभिन्न आन्दोलन र सामाजिक असन्तुष्टिलाई कसरी व्यवस्थापन गर्छन् भन्ने विषय पनि चासोका रूपमा हेरिएको छ ।
नयाँ सरकार गठनसँगै गृहमन्त्री गुरुङबाट सुरक्षा सुधार, प्रशासनिक पारदर्शिता र नागरिकमैत्री सेवा प्रवाहमा उल्लेखनीय काम हुने अपेक्षा गरिएको छ ।
आफ्नो प्रतिकृया दिनुहोस्