मटिहानी,(महोत्तरी) । हुलाक सेवा विभागले नेपालको सबैभन्दा ठूलो लक्ष्मीनारायण मन्दिर (मठ) मटिहानीलाई राष्ट्रिय महत्वका ऐतिहासिक सम्पदा मध्ये एकका रूपमा चिनाउन विशेष हुलाक टिकट सार्वजनिक गरेको छ। रु. १० अंकित सो टिकटमा मन्दिर र यसको बाह्य संरचना चित्रित गरिएको छ।
शुक्रबार आयोजित कार्यक्रममा सूचना तथा सञ्चार मन्त्री जगदीश खरेलले टिकटमा टाँचा लगाएर औपचारिक रूपमा प्रकाशनमा ल्याए। उनले मटिहानीलाई नेपाल भरि मात्र नभई अन्तर्राष्ट्रिय स्तरमा धार्मिक पर्यटन गन्तव्यका रूपमा प्रवर्धन गर्न सरकार प्रतिबद्ध रहेको बताए।
यस अघि मटिहानी नगरपालिकाले २०८१ साल असार ११ गते टिकट प्रकाशनका लागि विभागमा आधिकारिक प्रस्ताव पेश गरेको थियो। नगर प्रमुख हरि प्रसाद मण्डलले सो प्रस्ताव अघि सार्दै निरन्तर पहल गरेका थिए। टिकट सार्वजनिक भएपछि उनले हुलाक सेवा विभाग र मन्त्रालयप्रति धन्यवाद व्यक्त गर्दै भने, “यो कदमले मटिहानीको धार्मिक र सांस्कृतिक पहिचानलाई अझ बलियो बनाएको छ, स्थानीयवासीको गौरव बढाएको छ।”
लक्ष्मीनारायण मठ ऐतिहासिक, पौराणिक र राजगुठी सम्पदा भएकोले यसको संरक्षण र प्रवद्र्धन राष्ट्रिय स्तरमै आवश्यक रहेको प्रमुख मण्डलले जोड दिए। उनले मटिहानीलाई धार्मिक पर्यटन नक्सामा उचाल्न नगरपालिकाले थप कार्यक्रम अघि सार्ने जानकारी पनि दिए।
स्थानीय सरोकारवालाहरूले मन्त्री खरेलको सक्रियता र नगर प्रमुख मण्डलको पहललाई सराहना गर्दै हुलाक टिकट प्रकाशनले मटिहानीको राष्ट्रिय पहिचानलाई नयाँ उचाइमा पुर्याएको प्रतिक्रिया दिएका छन्।
आफ्नो प्रतिकृया दिनुहोस्