काठमाडौं । माघ २३ गते देखि प्रदर्शनमा आएका दुई नेपाली फिल्म ‘रमिताको पिरती’ र ‘कुमारी’ को बक्स अफिस कमाइ सार्वजनिक भएको छ ।चलचित्र विकास बोर्डले सोमबार सार्वजनिक गरेको विवरण अनुसार दुवै फिल्म बक्स अफिसमा कमजोर देखिएका छन् ।
सुदीप्ता निर्देशित ‘रमिताको पिरती’ ले पछिल्लो शनिबार (फागुन २) सम्म १९ लाख ४३ हजार ५८८ रूपैयाँ ग्रस कमाइ गरेको छ । उक्त कमाइ हुँदा फिल्मको ५ हजार ९३७ वटा टिकट बिक्री भएको उल्लेख छ ।
यसैगरी दिनेश राउत निर्देशित ‘कुमारी’ ले पछिल्लो शनिबार (फागुन २) सम्म सिनेपा: बक्स अफिसमा ५६ लाख २११ रूपैयाँ ग्रस कमाइ गरेको छ । यो अवधिमा फिल्मको १७ हजार २५ वटा टिकट बिक्री भएका छन् ।
यी दुवै फिल्म भ्यालेन्टाइन सिजनलाई लक्षित गर्दै एकसाथ रिलिज भएका थिए । फिल्मले प्रेम र भावनाको फरक–फरक आयाम प्रस्तुत गर्छन् । ‘रमिताको पिरती’ को मुख्य भूमिकामा अभिनेत्री आना शर्मा छिन् । साथमा धिरज मगर, समीर श्रेष्ठ, विनय श्रेष्ठ, जियाना, गौमाया गुरूङ, पशुपति राई, रेणु योगी, थिन्ले ल्हामोलगायत कलाकारहरूको अभिनय छ ।
त्यस्तै, ‘कुमारी’ मा अभिषेक खड्का र आकृति राजभण्डारी मुख्य भूमिकामा छन् भने घनश्याम जोशी, सुनिता श्रेष्ठ, आकांक्षा कार्कीलगायतको समेत अभिनय छ ।
आफ्नो प्रतिकृया दिनुहोस्